ЮЗ БИЛАН ЮЗЛАШГАНЛАР

БЕКОР ЎТИРИШНИ ХУШ КЎРМАЙДИГАН МОМО

Шаҳрихон тумани "Ҳақиқат" ҚФЙ Сарой маҳалласида табаррук инсон - Ҳошияхон она Олимова истиқомат қилади. Онахон бу йил юз билан юзлашди. Ҳошияхон момони кўрганлар онахоннинг дадиллиги, ҳаракатчанлигига ҳавас қилишади.

Биз ҳам онахонни зиёрат қилгани борган кунимиз момони ҳовлида куймаланиб, бир нималар қилиб юрган ҳолатда учратдик. Онахоннинг ўзлари бизни кутиб олди. Кенжа келини Кўпайхон онани чақирганида билдикки, келини ҳам набира, чеварали буви экан. Уйга киргач, гапимиз-гапимизга қовушди.

- Болам, не кунларни кўрмадик,-гап бошлади онахоннинг ўзлари. - Худога минг қатла шукр, шунча умр берди, ризқ насиба берди. Фарзандларим кунимга яради. Ҳозирам невара-чевараларимга айтаман: бир бурда нонга зор бўлиб, очликдан тинка мадоримиз қуриса ҳам чидадик, сабр қилдик. Энг муҳими, ҳеч қачон нопок йўл билан топилган луқма еганимиз йўқ, неки топган бўлсак, меҳнатнинг орқасидан топдик..

Онахон бошидан ўтказган кунларини сўзлаяптию 70-80 ёшни қоралаган катта ўғли Ра¬йимжон, келини, набиралари берилиб тинглаяпти.

- Айтинг-чи, узоқ умр кўришнинг сири намада? - дейман фариштадай ўтириб сўзлаётган Ҳошияхон момога.

- Онахон лўнда қилиб жавоб берди. - Энг аввало, ҳар ким Аллоҳ раво кўрган умрни, ҳаётни яшайди. Лекин ўзигаям боғлиқ жиҳатлари кўп. Ҳалол, покиза яшаш керак. Харомдан ҳазар қилиш лозим. Ишлаш керак, ишлагандаям пешонани терлатиб, меҳнат қилсангиз, яхши. Муҳими, асабни, соғликни асранг. Ана шунда юрак ҳам, қолган барча аъзоларингиз ҳам саломат бўлади.

Онасининг ибратли гапларини эшитиб ўтирган фарзанди Райимжон ота шундай дейди:

- Онамиз мен эсимни танибманки, гоҳ қўлида кетмон билан далада чигит экиб, пахта ундирган, гоҳида сув қўйиб, ўтоқ қилган. Эрта кўкламда эса пилла қурти боққан. Пахта очилиши билан белига этак боғлаб, пахта терган. Ўзлари айтиб қолади: "Бошимда 40-50 кило пахта, қўлимда эса ёш боламни кўтариб кетаверардим", деб...

- Овқатланиш ҳақида ҳам жиддийроқ "режим" сақлаганини билмайман, - дейди келини Кўпайхон опа. - Чунки борига шукр қилиб, топганини биз билан баҳам кўрганлар. Лекин қуруқ ва хўл мевалардан кўпроқ истеъмол қилишни канда қилмайдилар. Яна бир жиҳати, жуда ҳаракатчан, бекор ўтирганини кўрмайсиз.

Онахон турмуш ўртоғи Мамитали ота билан шу деҳқончилик орқасидан икки ўғил, бир қизни тарбиялаб, қаторга қўшишди. 17 нафар набира, 40 нафардан зиёд чевара, икки нафар эвара кўришди.

Энди пиру бадавлатлик даврини суришаётганида турмуш ўртоғидан айрилди. Унинг доғи унутилмай ўғли Мухторжон, ке¬йин эса келини оламдан ўтди. Хошияхон момо учун бу синовлар оғир келди. Ётиб қолди. Лекин "ўлганнинг ортидан ўлиб бўлмас экан", - деб момо кўзига ёш олади. Онахоннинг тўрт тарафини ўраб олган чевара, эваралари энажонисини ҳоли қўйишмайди.

Эл-юртга табаррук бўлиб қолган онахон эса шу кўзмунчоқдек эваралари билан яйрайди. Тўкин-сочин кунларимиздан, фаровон ҳаётимиздан мамнунлик туяди. Тилида-ю, дилида шукроналик. Уларнинг дуоси билан юртимизда тинчлик ҳукмрон.

Зумрадхон АБДУЛЛАЕВА.