ДЕПУТАТ - САЙЛОВЧИЛАР ҲУЗУРИДА

Ўзбекистон Республикаси Олий Мажлиси Қонунчилик Палатаси депутати Ҳафизахон Каримованинг сайловчилар билан учрашуви бўлиб ўтди. Унда Андижон шаҳар "9-Андижон" сайлов округи сайловчилари ҳамда Андижон қурилиш касб-ҳунар коллежи талабалари қатнашдилар. Учрашувда Ҳ.Каримова Олий Мажлиснинг қонунчилик Палатаси томонидан амалга оширилаётган ишлар, қабул қилинаётган Қонунлар ва Қонунларнинг фуқаролар манфаатларини ҳимоя қилишга қаратилаётганлиги тўғрисида сўзлади.

Шунингдек, депутат ўз сайлов дастурида белгилаган режалари юзасидан маълум ютуқларга эришганлигини гапириб, ахборот кутубхона соҳасини такомиллаштириш бўйича қабул қилинган Қонун кучга кирганлиги тўғрисида сайловчиларини хабардор қилди.

Мулоқот жараёнида учрашув қатнашчилари томонидан айрим соҳалардаги муаммолар очиқ ўртага ташланди. Депутат ўз ваколати доирасида муаммолар ечими юзасидан сайловчиларига амалий ёрдам кўрсатишини таъкидлади.

Тадбир Андижон қурилиш касб-ҳунар коллежи талабаларининг "Қувноқлар ва зукколар" танлови билан якунланди.

М.НОРБОЕВА.