ТИНЧЛИК, ОСОЙИШТАЛИК - БУЮК НЕЪМАТ

Инсоният тарихида турли мафкура ва маслаклар ўртасида зиддият ва қарама-қаршиликлар бўлгани боис, ўзаро келишмовчиликлар, нотинчликлар юзага келиб турган. Тарихга назар ташланса, ҳамма даврда ҳам давлатнинг ривожланиши, тараққий топиши, бу халқнинг фаровон ва осойишта ҳаёт кечиришига боғлиқ эканлигига яна бир бор амин бўласан, киши.

Қуръони Карим таълимотига кўра, мусулмон киши ҳар бир хатти-ҳаракати учун Парвардигори олдида масъулдир, у адолатпарвар бўлиб раҳм-шафқат кўрсатиши, ожиз, муҳтож кишиларни асраб-авайлаши ва ҳимоя қилиши, бошқаларни ер юзида бузғунчилик қилишдан қайтариши лозим.

Дунёда тинчлик энг олий неъмат эканлигини жаҳондаги барча миллат-у элатлар бугунги кунда тан олмоқда.

Аллоҳ таоло Қуръони Каримнинг "Бақара" сураси 208-оятида марҳамат қилади: "Эй, имон келтирганлар! Исломга тўлалигича киринг. Ва Шайтоннинг изидан эргашманг. Албатта, у сизга очиқ-ойдин душмандир".

Ояти каримадаги Исломнинг маъноларидан бири - бу тинчликдир. Оятда тинчликка тўлалигича киринг, дейилмоқда. Тинчликка тўлалигича кириш эса Исломни татбиқ қилиш билан бўлади.

Исломда тинчлик инсон қалбининг тинчлигидан бошланади. Сўнгра қалбдаги тинчлик оилага кўчади. Ислом оила тинчлиги учун зарур бўлган барча чораларни ишга солади. Демак, аста-аста оиладаги тинчлик қўни-қўшни, қариндош-уруғлар орасига кўчади. Сўнгра тинчлик жамиятга кўчади. Ҳар бир жамият ўзаро тинчликда яшаш учун нималар қилиши лозимлиги ҳам Исломда белгилаб қўйилган. Давлат миқёсида тинч яшашга эса инсон аввало, қалби тинч, оиласи хотиржам, қўни-қўшниси осуда, қариндош-уруғлари халоватли, асосийси, жамияти тинч бўлгандагина эриша олади.

Жаноб Расул Акрам (с.а.в.) муборак Ҳадиси шарифларида айтадиларки: "Икки неъмат борки, кўпчилик инсонлар унинг қадрига етмайдилар. У хотиржамлик ва сиҳат-саломатлик".

Инсонда хотиржамлик бўлмас экан, на егулигида ҳаловат бўлсин, на уйқусида. Кўнглига ҳеч нарса сиғмайди, чунки унда хотиржамлик йўқ-да! Агар кишининг саломатлиги бўлмаса, у суйиб тановул қиладиган лаззатли таом ҳам татимайди. Чунки унинг танасида оғриқ бор. Ҳадиси шарифдан кўриниб турибдики, тинчлик, осойишталик ва хотиржамлик улуғ неъматдир. Тинчлик бор жойда юрт равнақ топади.

Шу маънода, юртимиздаги бугунги кун, ҳаётимиз хусусида тўхталмоқ жоиз. Бугунги кун бутун жаҳонда инқироз юз бериб, кризисга учраб турган бир пайтда, юртимизнинг кундан-кунга ривожланиб, йирик давлатлар сафидан жой олиши, бу тинчликнинг барқарор эканлигидан далолат эмасми? Юртимизда турли миллат ва элатлар истиқомат қилади. Бу элатларни урф-одатлари, қадриятлари қонун нуқтаи назаридан ҳимоя қилиниши билан бир қаторда, бир-бирига дўстона муносабатда бўлиши, улар орасида қуда-андалик ришталари боғланиб, яқин қариндош бўлиб яшаши, бу муносабат эса миллатлараро тинчлик ва дўстлик ҳамоҳанг этган юрт эканлигидан далолатдир.

Куни-кеча гўзал Андижонимизда катта байрам тадбири бўлиб ўтди. "Ободлик кўнгилдан бошланади" деб номланган бу байрам юртимизда тинчлик, осойишталик барқарор эканлигини яна бир бор элга намоён этди.

Ҳа, халқимизнинг тинчлиги, осойишталигини сақлашда ҳар бир фуқаро огоҳликка катта эътибор бериши лозим. Юртбошимизнинг "Лоқайдлик, бепарволик - энг ёмон иллат" деган сўзларини унутмаслик лозим. Жонажон, ҳур Ўзбекистонимизга кўз тегмасин!

Ҳожиакбар ЯҲЁЕВ,

Андижон шаҳар,

Боғишамол даҳасидаги,

"Зубайр ибн Аввом"

жомеъ масжидининг

имом-хатиби.