ЮЗ БИЛАН ЮЗЛАШГАНЛАР

ШУКР ҚИЛГАН МУРОДИГА ЕТАДИ

Мустақиллигимизнинг 20 йиллиги шарофати билан юртимизнинг барча гўшаларида байрамона тараддуд. Миллий қадриятларимиз бешиги аталмиш қишлоқ, маҳалла ва кўчаларнинг гуллаб-яшнашида эса ёшу улуғларимиз бош.

Байрам арафасида юз баҳорни қаршилаган юртдошларимизнинг ҳам кўнглида уйғоқчилик, дилларида шукроналик. Кекса ота-оналаримизнинг самимиятлиги ва бағри кенглиги дилларга хушнудлик бағишлайди. Мана шундай самимий юртдошларимиздан бири бир асрни қаршилаган мўътабар ва мунис онажонимиз Турғунжон хола Сайназаровадир. Онахон бу йил 104 ёшга тўлди. Тур-ғунжон хола Избоскан тумани Тўрткўл қишлоғида 1907 йилда туғилган. Асли қорилар оиласидан бўлганлиги сабабли жуда эрта турмушга узатилган. - Ҳаётнинг нима эканлигини билмай рўзғор қилганман. Қайнонам раҳматли ўз боласидай кўриб, ёнида олиб юриб иш ўргатган. Рўзғорга тайёрлаган. Турмуш ўртоғим ҳам ёш туриб уйланган. Шунданми, бир-биримизга боғланиб яшадик. Доимо бир-биримизга суянчиқ бўлдик. Ҳаётда нимаики қийинчилик бўлса тенг тортишдик. Колхозда ишладик. Пахта етиштирдик, пилла қурти боқдик. Шунинг орқасидан икки ўғил, икки қизни вояга етказдик. Фарзандларимизни ҳеч кимдан кам қилмадик.

Турғунжон момо турмуш ўртоғи бевақт вафотидан сўнг болаларига ҳам ота, ҳам она бўлди. Ўғли Ҳамиджон ака Сайфуддинов бир неча йил Чувама ва Пахтаобод туманларида бош шифокор бўлиб ишлади. Онахон икки қизи ва бир ўғлидан айрилганида, дунё кўзига тор кўринди. Қадди букилди. Аламларини ичига ютди. Тақдирнинг ёзувидан қочиб бўлмаслигини айтиб, кўзига ёш олди. Ҳаётни аччиқ-чучугини тотган, тоғдай залворли қи-йинчиликларни енгиб ўтган Турғунжон она бу йўқотишлардан анчагача ўзига келмади. - Умримнинг ярмидан кўпи қийинчиликда ўтди, - сўзида давом этди момо. - Қатоғонлик йиллари... Шукр бугун эса ўша машаққатлар эвазига тўкин-сочинликка, тинч-тотувликга эришдик. Энди у пайтларни ўйласам, менга қўрқинчли тушни эслатади.

Ҳа, бугун пиру бадавлат онахон эл-юрт, фарзандлари эътиборида, эъзозида 9 та набира, 25 нафар чевара ва жажжигина эваралари онахон атрофида парвона. Уларнинг шўх-шодон кулгуларидан завқланиб, шундай эркин ва озод юртда яшаётганлигини айтиб, қайта-қайта шукр қилади. Онахоннинг дуолари билан эса юртимиз тинч, осудадир. Шундай фариштасифат момоларимизнинг қўр бағишлаб ўтириши эса хонадонларимиз, юртимиз зийнатидир.

Нигора СОЛИЕВА,

Избоскан тумани.