"Theatre.uz"—халқаро миқёсдаги фестиваль

Кўп йиллар орзу қилинган ижодий режалар амалга ошмайдиган бўлса, улардан воз кечиш—фожиа. Дилдаги армон юзага қалқиб чиқиб паришон қилади ва санъаткорни хеч қачон тарк этмайди. Бу туйғу эзгуликка хизмат қилади, албатта. Мазкур фикрни Ўзбекистонда хизмат кўрсатган санъат арбоби, Ўзбекистон Ёшлари театри бадиий раҳбари Наби Абдураҳмоновга нисбатан айтиш мумкин. Зеро, бу ижодкорни ўз касбининг фидойиларидан, айнан театр санъатининг жонкуярларидан дейиш тўғри бўлади.

"Юракда ўти бўлса, олови кўринади", дейишади. 2009 йил "Style.uz" санъат ҳафталигининг якунига бағишланган матбуот-анжуманида ана шу юракдаги ўт билан театр санъатига бўлган эътиборни янада кучайтириш, театр фестивалларини ташкил этиш ва буни амалий қўллаб-қувватлаш масалаларини дадил кўтариб чиқиб, таъбир жоиз бўлса, дилида сақлаб келган орзусини ошкор этган Наби Абдураҳмонов, орадан оз фурсат ўтиб бу орзусининг рўёбини кўришга муяссар бўлди. Бинобарин, Аrt Week Style.uz- 2010 ҳафталиги доирасида Фонд Форум, Ўзбекистон Ёшлари театри ҳамкорлигида ташкил этилган "Тhеatre.uz" биринчи халқаро фестивали бунга яққол мисол бўла олади.

Мазкур фестивальнинг асосий мақсади юртимиз пойтахти Тошкент шаҳрини халқаро миқёсдаги йирик театр марказига айлантиришдир. Дастлаб фестивал дастурида асосан пойтахт театрларининг ва узоқ-яқин давлатларнинг қизиқарли спектакллари намойиш этилган бўлса, бу йил фестивал дастури кўлами янада кенгайтирилиб, республикамиздаги барча вилоят театрлари ҳамда кўплаб хориж давлатларнинг театр жамоалари ҳам иштирок этиши кўзда тутилган. Қолаверса, чет эл мутахассисларининг маҳорат дарсларини ўтказишлари ва фестиваль кунлари доирасида янги саҳна асарини дунёга келтиришлари кутилмоқда.

--Бундай қизғин ижодий ҳамкорликлар ва ўзбек-хориж театрларининг ўзаро ижодий мулоқотда бўлиши, ўйлайманки, келгуси фаолиятимизда ўзининг ижобий таъсирини кўрсатмай қолмайди,-дейди Н.Абдурахмонов. - Бундан янада янги лойиҳалар, янги саҳна асрлари дунёга келишига ишончим комил. Биз бунга қодирмиз! Бизда бунинг учун бино ҳам, ишчи кучи ҳам, асосларимиз ва имкониятимиз ҳам бор.Энг асосийси эса сиз томошабинлар борсизлар!

Хулоса шуки, "Тheatre.uz" фестивалининг мақсади дунё театрлари билан ҳамкорлик қилиш ва энг муҳими уларни бизнинг театрларимизга жалб этиш эканлиги мухлисларни хурсанд қилади.Шунингдек, бизнинг маданий ҳаётимизни янада тўлдиради.Бу жараёнлар шунчаки кўрик, беллашув бўлибгина қолмай, балки дийдорлашув, ўзаро таъсирланиш ва бойиш ҳамдир.Бунда қанчадан-қанча янги ижодий режалар тузилмайди дейсиз. Театр санъатига бўлган эътибор ҳам шундан!