СЎЗСИЗ КУЛДИРУВЧИ СУРАТЛАР КЎРГАЗМАСИ
Ўзбекистондаги Франция Институти пойтахтимиз Тошкентда бўлиб ўтувчи "Art week style.uz-2011" ҳафталигидан ўрин олган комикс суратлар кўргазмасига машҳур француз рассоми Александр Клериссни таклиф этди. Юртдошларимиз ёш рассомнинг 24 октябрь куни Миллий санъат марказида очиладиган кўргазмасидан баҳраманд бўлишлари мумкин.
Ангулемдаги Олий тасвирий саъат мактаби битирувчиси Александр Клерисс шу вақтга қадар ўзининг "Джаз клуби" (2007 й) ҳамда "Ўлимни алдаш" (2011 й) тўпламларини яратган. У кўплаб газета ва журналлар, шунингдек, бир қанча нашриётларда ёшларнинг севимли рассоми сифатида фаолият олиб боради.
Миллий санъат марказида бўлиб ўтувчи Биеннале замонавий санъат дастури доирасидаги кўргазмада рассом Клерисснинг қаламда чизилган, трафарет чоп этилган ҳамда компьютер графикаси ёрдамида турли хил техник услубларда ишланган 40 та асари тақдим этилади. Унинг мақсади ўз ишларининг хилма хиллигини комикслар, иллюстрация ҳамда графика ёрдамида кўрсатишдир. Айнан шу хилма хиллик Франция замонавий график санъати тараққиётига муносиб ҳисса қўшаётир.
Александр Клерисс Ўзбекистондаги Франция Институтида рассомчиликка қизиқувчи ўнлаб иқтидорли талабалар, санъат ихлосмандлари ҳамда ёш рассомларга "Комиксларни яратиш санъати" мавзусида бир ҳафта давомида семинар дарсларини ўтказади. Семинар иштирокчиларининг ишлари алоҳида кўргазма шаклида Франция Институтида 18 ноябрга қадар намойиш этилади.
Мансур Тангишов
|