14 ЯНВАРЬ - ВАТАН ҲИМОЯЧИЛАРИ КУНИ

Андижоннинг Тўмариси

Муҳтарамхонни Андижоннинг Тўмариси деб аташ мумкин. Чунки у бир пайтлар афсонавий қаҳрамон Тўмарисга ҳавас қилганди.

Миллий байрамимиз - Наврўзда от миниб, дубулға кийиб, қўлида қилич ўйнатиб, Тўмарис образига кирган эди. Ўшанда илк бор шу ўйларни кўнглидан ўтказган: "Ўзбек аёллари ҳам Ватанни ҳимоя қилса бўлади-ку? Наҳот, биз Тўмарис бўлолмаймиз?.."

- Ҳарбий хизмат соҳасига ишга киришимга ўша воқеа сабаб бўлган, - дейди чегара қўшинлари ҳарбий қисми кичик сержанти, "Шуҳрат" медали соҳибаси Муҳтарамхон Алиева фаолиятидан сўзлаб. - Унгача коллежда дарс берардим. Хонободда ҳарбий қисм очилиши мен учун ҳавасларим йўлидан боришга имкон яратган. Аввал бошда тоғам Тўлқин ака Қорабоевга ҳавас қилганман. У ҳарбий хизматчи эди. Ҳар гал полковник тоғамнинг бизникига келиши байрам бўлиб кетарди.

Тақдирда бор экан, ҳозир ўзимнинг эгнимда ҳам ҳарбий уст-бош, қатор медаллар...

Муҳтарамхон Алиева хонободлик ишчи Худойберди ва 40 йилдан ортиқ умрини ўқитувчиликка бахшида этган Маҳбуба ая Алиевалар хонадонида туғилган 6 қизнинг бири. Айтишича, ёшлигида жуда нимжон ўсган экан.

Шу боис ҳам дадаси уни спорт билан шуғуллантира бошлади. Шу-шу Муҳтарамой спортга қизиқиб кетган...

- Ҳа, спортга ёшликдан қизиққанман, - дейди Муҳтарамхон. - Бунга раҳматли дадам сабабчи бўлган. Соғлом бўлиш учун спорт билан шуғулланишинг керак, деб мени югуртириб, машқ қилдирарди. Енгил атлетика билан анча йиллар шуғулландим. Кейин эса спортнинг каратэ, самбо турларини ўргандим.

Дарҳақиқат, кишининг соғлигига спорт катта фойда беради. Болалигида нимжон бўлган қизалоқ дадаси олиб берган велосипедда учганда ўзини анча енгил ҳис қиларди. Қисқаси, спорт уни даволади. Тасаввур қилинг, "Энди умрига боғлиқ..." дея унинг яшаб кетишига гумонсираган шифокорлар ҳам бугун ҳайрон: Муҳтарам Алиева спортнинг оғир атлетика тури билан шуғулланмоқда.

- Тош кўтариш машқига 1998 йилдан ўтганман. Мураббийим Альберт Валиев машқ сирларини қунт билан ўргатарди. Бошида 16 килолик тошларни кўтаришни машқ қилдим. Эндиликда ўз вазн тоифам бўйича тош кўтаришнинг "пауэрлифтинг" турида шуғулланаман.

Дарвоқе, спортда танилишни, юқори чўққиларга чиқишни у бундан 30 йил аввал ҳақиқатда ҳавас қилган эди. 1980 йили Москвада бўлиб ўтган Олимпиада ўйинларини телевизорда кўриб ўтириб:

- Дада, мен ҳам яхши спортчи бўлармикинман? Олимпиадаларда қатнашишни орзу қиламан, - деган эди.

Қизидаги орзу-ҳавас ота меҳрини жўштирган, вақтлар келиб, у албатта, спортда ютуқларга эришишига ишонган. "-Албатта, яхши спортчи бўласан. Мен сени дуо қиламан" деган ва Муҳтарамхонга оқ фотиҳа берган.

Мана, бугун Муҳтарамхон халқаро тоифадаги спорт устаси, кўп карра Ўзбекистон чемпиони, 2 марта Осиё чемпионатида ғолиб чиққан, Италияда ўтган (2010 йили) жаҳон чемпионати соҳиби ва 2011 йили Афинада бўлган Жаҳон чемпионатидан ҳам кўксига олтин медаль тақиб қайтган моҳир спортчидир!

Буларнинг барчаси ота дуосидан. Оилада ўғил бўлмагани боис, қизлардан умид қилган Худойберди Алиевнинг руҳи шод бўлсин, илоҳо! Қизи бугун давримиз Тўмариси. Эгнида ҳарбий уст-бош, кўксида Ватан ғурури мужассам. Гарчи, аёл, лекин кичик жуссаси билан Ватанимиз сарҳадларини қўриқлаб, эл-юрт тинчлигини сақлашда фидойи.

- Мен бахтли аёлман, - дейди Муҳтарамхон суҳбат якунида. - Чегарада, хизмат постимда туриб, муҳтарам юртбошимиз билан учрашишга мушарраф бўлдим. Унга ниятимни айтдим. Ниятим, нуфузли спорт мусобақаларида ғолиб чиқиб, Ватанимиз байроғини баланд кўтариш ва миллатимиз шаънини улуғлаш эди. Президентимиз қўлларимни сиқиб, ниятимга етишимни тиладилар. Мен Милан ва Афина шаҳарларида Ўзбекистон байроғини баланд кўтариб, юртбошимиз тилакларини бажо этдим. Бу менинг жонажон Ўзбекистон учун фарзандлигим ифодаси бўлди.

Маҳфуза НОРБОЕВА.

Суратда: М. АЛИЕВА.