ҚУТЛОВ

Камтарин ижодкор

Камтарин шоир Суҳайлий(Қоражон Қодиров) 1937 йилда Андижон тумани, Храбек қишлоғида туғилган. Андижон давлат педагогика институтининг ўзбек тили ва адабиёти факультетини тамомлаб, узоқ йиллар қишлоқ мактабларида ёш авлодга таълим-тарбия берган. Ҳозир нафақада.

Ижодкор муаллим деярли 50 йилдан буён матбуот нашрларида ўз шеърлари билан қатнашиб келмоқда.

Қ. Қодировнинг "Сен бир гулсан" ва "Истиқлол қўшиқлари" номли китоблари чоп этилган.

Таҳририятимиз шоирни қутлуғ 75 ёши билан барча газетхонлар номидан муборакбод этади.

ЗАМОНАМИЗ ҚИЗЛАРИ

Замонамиз қизлари куйдирмажонга ўхшар,

Чақнаб турар кўзлари шўхи жононга ўхшар.

Бир-биридан чиройли, ширин-шакар сўзлари,

Бўйлари сарв, шамшод, садда райҳонга ўхшар.

Турли-туман йигитлар балки уларга ёқмас,

Дилларида мустаҳкам аҳду паймонга ўхшар.

Йигитларни куйдириб, мафтуну масрур айлар,

Нигоҳлари сеҳрли, сирли қопқонга ўхшар.

Озод ва ҳур Ватанда ўйнаб-кулиб яшнайди,

Рақс, қўшиқ шайдоси, ширин хушҳонга ўхшар.

Ҳавас бирлан қарайди Суҳайлий шўх қизларга,

Қалбида бор пок севги, аммо ниҳонга ўхшар.

СУҲАЙЛИЙ.