БИЛАСИЗМИ?

ЧАЙНА, БИРОҚ ҲАР ЖОЙГА ТАШЛАМА

Бундан бир неча йиллар аввал Буюк Британияда одамлар чайнаган жвачкасини фақат нимпушти аҳлатдонларга ташлашга ўргатиш кампанияси ўтказилган эди. Қоидани бузганлардан 80 фунт-стерлинг жарима олинарди.

Шаҳар экологиясига ғам-хўрликнинг иқтисодий жазо билан уйғунлиги жвачка чайновчиларни анча тартибга солган эди. Негаки, Британия ҳукумати кўчаларни, ҳиёбонларни жвачка қолдиқларидан тозалаш учун ўртача 170 миллион атрофида пул сарфларди-да!

Тартибсиз жвачка чайновчилар учун жарима ҳануз амалда.

ЧИҚИНДИДАН

ДАРОМАД

Австралияда чайнаб ташланган жвачкаларни тўплаш бўйича вақти-вақти билан ўзига хос ҳашар ўтказиб турилади. Тўпланган чиқинди жвачкалар қайта ишланиб, ундан резина пойабзаллар тайёрланади.

Тиниб-тинчимас хитойликлар эса чайнаб ташланган жвачка чиқиндиларини Германиядан сотиб олиб, уларни қайта ишлаб пишиқ иплар, ҳатто, экспорт учун кийимлар ҳам ишлаб чиқарадилар.

МОҲИР ҚЎЛЛАР ҲИССАСИ

Ақл-фаросатни ишлатган кишилар нималарни ўйлаб топмайди, дейсиз. Масалан, чайнаб ташланган жвачкадан озроғи туфлилар пошнасига ёпиштириб қўйилса, полда ва бетонда юрилганда тақилламайди. Бундан ташқари, чайналган жвачка билан тешилган автобаллонларни, водопровод шлангларининг тешикларини ямаш, беркитиш мумкин.

Ахир, дунёда ортиқча нарса йўқ. Ҳамма гап тежамкорликда, бор нарсадан оқилона фойдаланишдадир.

М.НОРХЎЖАЕВ тайёрлади.