МУҚАДДАС АЁЛ
Аёл-бахт тимсоли, нафис бир хилқат,
Аёлга берармиз юксак эътироф.
Не ғам, не кулфатга қиларлар тоқат,
Аёл муқаддасдир, муҳаббати соф.
У она, сингил-у садоқатли ёр,
Нафосат олами унда мужассам.
Бир боқсанг, кўзида қалб меҳри ошкор,
Зилол сувдек покдир, азиз, мукаррам.
Аёл бахт демакдир, умримиз кўрки,
Она у! Фарзандчун чекар алам, дард.
Мунгли кўзларидан тўкилар ашки,
Беғубор қалбига қўндирмайлик гард.
Аёл муқаддасдир, шул меҳрибон зот,
Инсон фарзандига фидо бўлгувчи.
Илоҳим, ғам-андуҳ бўлсин унга ёт,
У қалблар аршида мангу қолгувчи!
Дилдора ҒАНИЕВА.
|