Пазанда маслаҳати

ГЎШТЛИ "ЧЕБУРЕК"

Керакли масаллиқлар: Уч стакан ун, 250 граммдан сариёғ ва ўсимлик ёғи, 1 дона тухум, 300 гр. қийма, 2 дона пиёз, таъбга кўра туз.

Тайёрланиши: Иссиқроқ бўлган намакоб сувга 50 гр. сариёғни солиб, эритасиз ва тухум чақиб, хамир қорасиз. Иссиқ ўраб, хамирни тиндиришга олиб қўясиз.

Қолган сариёғни қизиган қозонда эритиб, унга паррак қилиб тўғралган пиёзни кейин қиймани солиб қовурасиз. Тузини ростлаб, қозон устини ёпиб қўясиз.

Тинган хамирни тахта-ўқлов ёрдамида ёйиб оласиз. Ёйилган хамирга ўртача катталикдаги ликопни қўйиб, пичоқ ёрдамида доира шаклида кесиб чиқасиз. Хамир ўртасига бир ош қошиқдан қийма солиб, ярим ойсимон қилиб тугасиз. Сўнг хамирнинг тугилган тарафини шаклдор пичоқ билан қирқиб чиқасиз.

Тайёр бўлган "чебурек"ларни ёғда қовуриб оласиз.

МЕВАЛИ ДЕСЕРТ

Керакли масаллиқлар: Биттадан олма, нок, банан, мандарин, киви ва 1 дона плиткали қора шоколад.

Тайёрланиши: Меваларни майда тўртбурчак шаклида тўғрайсиз ва яхшилаб аралаштирасиз. Дессертни дастурхонга тортишдан аввал ликопга солиб, устидан қирғичнинг катта тарафидан ўтказилган шоколад сепасиз.

"Таомнома" китоби асосида ГУЛИ тайёрлади.