МУЛОҲАЗА
ДОН УВОЛИ
Ерга яхши ният билан уруғ қадаб, парваришлаб, ундан ризқ-рўз яратиш учун қанча машаққатли меҳнат керак бўлишини ҳамма ҳам билавермайди.
Албатта, бундай ноз-неъматга тўла, тўкин ҳаётнинг қадрига етишимиз фарзандларимизга ҳам уларни асраш-авайлаш, тўғри муносабатда бўлиш каби фазилатларни уқтириб ва ўргатиб боришимиз керак.
Яқинда телеканалларимиздан бирида эфирга узатилган "Фойдали маслаҳатлар" кўрсатувини томоша қилиб, тўғриси ранжидик. Унда томошабинларга ўз қўллари билан ҳам ошхона учун асқотадиган, ҳам совға сифатида тақдим этса бўладиган анжом ясаш сирлари ўргатилди. Таассуфки, мазкур анжом атрофини безаш учун дон маҳсулотларидан гуруч, мош, нўхат кабиларни елимлаб ёпиштириш лозим бўлди. Ўша донлар устидан тирноқ учун мўлжалланган рангсиз лак бўёғи суртилди.
Ачинарли жиҳати шундаки, шу кичкинагина арзимас буюм учун бир пиёлача дон ишлатилди.
Ахир, ноннинг ушоғи ҳам нон. Дон - ризқу рўзимиз. Шундай экан, ёш авлодга тўғри йўл-йўриқ кўрсатиб, уларни тўкинчилик неъматларини исроф қилмасликка ўргатиш бурчимиздир.
Зумрадхон СОТВОЛДИЕВА.
|