ҲАР БИР ХОНАДОНГА ДАДИЛ КИРИБ БОРАМАН
Уч мингдан зиёд аҳоли, 570 та хўжалик, 733 та оиладан иборат "Пахтакўл" маҳалламизда ҳамма бир-бирига дўст, ҳамжиҳат бўлиб яшайди. 1845 нафар хотин-қизнинг ўзига яраша қувончу ташвишлари бор.
2004 йилдан буён маслаҳатчи вазифасида ишлаб, маҳалла аҳли билан туғишгандан зиёда бўлиб кетдик. Бирини опа, бирини сингил, яна бирини онам деб хонадонига дадил кириб бораман. Оилавий муаммоларига ечим топишда маҳалла фаоллари Соҳибахон Саббурова, Ўктамхон опа Холмирзаева, Сотволди ака Мамажонов ҳамда Қодирали ака Умрзоқовлар маслаҳатига суяниб, баҳамжиҳат ҳал қиламиз.
Қадриятларимизни тиклаш, тўй ва бошқа маросимларни камчиқим, тартибли ўтказиш, озодаликни, орасталикни таъминлаш, боғлар, гулзорлар яратиш... Бу каби хайрли ишларга Лобархон Араббоева, Адолатхон Каримова, Султонхон Деҳқонова сингари дастурхончилар, Хурсаной Умаралиева, Мавлудахон Аҳмедова каби отинойилар билан биргаликда бош-қош бўламиз.
Маҳалладаги кам таъминланган, кўп болали оилалар, етим-есирлар, ўзгалар парваришига муҳтож кишиларни ижтимоий муҳофаза қилиш, меҳр-мурувват кўрсатишда ҳомийларимиз - тадбиркорлар Анваржон Умаралиев, Мирзажон Зокиров, фермер Муҳаммаджон Юсуповлар ўзларининг беминнат ёрдамларини беришмоқда.
Маҳалламизда кўпни кўрган, пиру бадавлат инсонлар кўп. Улар билан ўтказилаётган учрашувлар, суҳбатлар, болаларимиз таълим тарбиясида муҳим аҳамият касб этмоқда. Бу оилалар тотувлигини, "Энг ибратли хонадон", "Намунали кўча" кўрик-танловлари эса маҳаллалар ободлигини таъминлашга хизмат қилмоқда.
Оила барқарорлиги, аёллар саломатлигини таъминлаш йўлида олиб борилаётган барча саъй-ҳаракатларимиз, энг муҳими, ҳуқуқий саводхонликни оширишдан мақсад-иш ўринлари ташкил этиш орқали оилаларга кўмак беришдан иборат. Қачонки, оилаларда тинчлик, хотиржамлик бўлар экан, бу тинимсиз қилинаётган ишлар самарасидир.
Соҳибахон АЛИМАТОВА,
"Пахтакўл" маҳалласи маслаҳатчиси.
|