ЯНГИ КИТОБ

"СЕВГИМ ПАРВОЗИ"

Марҳаматлик Фароғат Абдураимова ёш ижодкорлардан бири. У тумандаги Муҳаммад Юсуф номли адабий тўгарагига қатнаб, ижоднинг сир-асрорларини ўрганиб келмоқда.

Яқинда "Андижон нашриёт-матбаа" МЧЖда ёш шоиранинг мўъжазгина китоби нашр этилди. "Муаллифнинг биринчи китоби" рукнидаги мазкур китоб "Севгим парвози" деб номланади.

Китобдан ижодкорнинг Ватан, она, меҳр-муҳаббат мавзуларидаги шеърлари ўрин олган.

"Бугунги кунда юртимизда ёш авлодни ҳар жиҳатдан қўллаб-қувватлаш, уларнинг ўз иқтидор ва салоҳиятларини тўлақонли юзага чиқариш учун барча шарт-шароитлар, кенг имкониятлар яратиб берилган,- деб ёзади Муҳаммад Юсуф номли ёш ижодкорлар адабий тўгараги раҳбари, ижодкор Абдураҳим Бозорбоев китоб сўзбошисида. - Шу боис ҳам ёшлар ҳар жабҳада фаол ва илғорлар. Айниқса, бадиий ижод соҳасида иқтидорли ва қобилиятли ёшлар сафи тобора ортиб бормоқда. Ана шундай ёшлардан бири ижод сўқмоқларида эндигина тетапоя бўлаётган Фароғат Абдураимовадир....Унинг "Севгим парвози" деб номланган ушбу китоби билан танишар эканман, унда ижодга, шеъриятга интилиш, иштиёқ кучли эканлигини кўрдим. Ижод намуналарида ёшликка хос беғуборлик, орзу-умидлар оғушида сармаст бўлган ёш қалбнинг кечинмалари ўзига хос тарзда тараннум этилган...".

Биз Фароғат Абдураимованинг ижодига парвозлар тилаб, китобхонларга келажакда янги-янги шеърий тўпламларини туҳфа этади, деб умид қиламиз.

Улуғбек АБДУСАЛОМОВ.