АНДИЖОНДА АДАБИЁТ БАЙРАМИ
Андижон вилоят ҳокимлиги, Ўзбекистон Ёзувчилар уюшмаси ҳамкорлигида юртимиз мустақиллигининг 21 йиллик байрамига бағишланиб, "Тақдиримсан, бахтимсан, эркин ва обод Ватан" шиори остида Андижонда адабиёт ҳафталиги бўлиб ўтди. Ҳафталик доирасида қатор тадбирлар ўтказилди.
Тадбирларда республикамиз пойтахтидан, шунингдек, қўшни Фарғона ва Наманган вилоятларидан ташриф буюрган таниқли шоир ва ёзувчилар, ёш ижодкорлар иштирок этдилар.
Айниқса, "Шаҳрихонсой мавжлари - 2012" ёш ижодкорлар анжумани адабиёт ихлосмандларида катта таассуротлар қолдирди.
Анжуманда Фарғона водийси вилоятларидан 70 нафардан зиёд ёш ижодкорлар қатнашдилар. Меҳмонлар ва ёш ижодкорлар дастлаб шаҳрихонлик маърифатпарвар шоир Оразий қабрини зиёрат қилдилар, сўнг шоир уй-музейини кўздан кечирдилар.
Шаҳрихонннинг гўзал ва обод гўшаларидан бири - Мингчинорда ташкил этилган "Мустақиллик мушоираси", "Устозлар билан ёш ижодкорларнинг адабий мулоқоти" тадбирлари очилишида сўзга чиққанлар юртимизда ёш авлодга, хусусан, ижодкор ёшларга кўрсатилаётган эътибор ва ғамхўрлик ҳақида гапирдилар.
Мушоирада устоз шоирлар томонидан она Ватан мадҳини тараннум этувчи шеърлар ўқилди. Анжуманда ёш ижодкорлар ўз ижод намуналари билан фаол иштирок этдилар.
Анжуманда фаол иштирок этган бир гуруҳ ёш ижодкорлар ташкилотчиларнинг диплом ва эсдалик совғалари билан тақдирландилар.
Ю.ЎРМОНОВА.
|