ЯНГИ КИНОФИЛЬМ ТАҚДИМОТИ

З. М. Бобур номидаги Андижон вилоят драма ва комедия театрида "Ўзбеккино" миллий агентлиги буюртмасига асосан суратга олинган "Тубанлик" кинокартинасининг тақдимоти бўлиб ўтди. Мазкур кинокартинада диний ақидапарастлик оқимига кириб қолиб, алданганлар, қизларни эрта турмушга беришликнинг салбий оқибатлари, оиладаги турли можаролар тўғрисидаги воқеликлар қизиқарли тарзда тасвирланган.

Тадбирда фильм режиссёри Ҳилол Насимов, Ўзбекистонда хизмат кўрсатган артистлар Мирзо Азизов ва Лола Элтоевалар фильмнинг мазмуни ва тарбиявий аҳамияти ҳақида гапирдилар.

Шундан сўнг, ёшларни, умуман, кенг жамоатчиликни огоҳликка, ҳушёрликка чақирувчи мазкур фильм андижонлик талаба - ёшларга намойиш этилди.

Фильм тақдимоти тадбирида вилоят ҳокими Аҳмаджон Усмонов иштирок этди.

И. БУРГУТБОЕВ,

талаба.