САНЪАТИМИЗ ЮЛДУЗЛАРИ

БАЪЗАН САНЪАТКОР БЎЛГАНИМДАН АФСУСЛАНАМАН

Хосият Ҳусановани "Олинг қуда, беринг қуда", "Шаббона", "Қирқ тоғоранинг қирқ ноғораси" каби кўплаб фильмларда яратган турфа хил образлари орқали яхши биламиз.

Актрисанинг санъатга кириб келиши, ижодий фаолияти ва айни кундаги қарашлари билан ўртоқлашиш учун Ўзбек Миллий драма театрига ташриф буюрдик. Актриса билан бўлган суҳбатни газетхонлар эътиборига ҳавола этишни лозим кўрдик.

- Хосият опа, сиз санъатга қандай кириб келгансиз? Суҳбатимизни айнан шу мавзуда бошласак.

- Менинг ота-онам болалигимдан "Келажакда санъаткор бўласан", деб тарбиялашган. Шунинг учун мен ҳам дунёда артистликдан бошқа касб бўлмаса керак, деб улғайганман. Ота-онам санъатга алоҳида меҳр қўйган, шинаванда одамлар бўлган. Онам ҳам миллий ва фольклор қўшиқларни маромига етказиб ижро этар, пахта далаларида ҳам овозининг борича ашулалар айтиб, вақтини чоғ қилиб юрардилар. Албатта, уларнинг ёнида мен ҳам шу қўшиқларга жўр бўлиб, уларни куйлаб улғайганман. Отам раҳматлини-ку гапирмаса ҳам бўлаверади. Қўллари ишга тегди дегунча, қўшиқ бошлардилар. Тағин ҳиргойи қилиб эмас, бор овозлари билан куйлаб кетардилар. Отамнинг бу қилиғига қўни-қўшнилар ҳам ўрганиб кетишган эди. Баъзан ўйлаб қоламан, агар биздаги имкониятлар уларнинг ёшлик даврларида бўлганида эди отам ҳам, онам ҳам, албатта, санъаткор бўлишарди. Шунинг учун мен бошқа кўплаб ҳамкасбларимдан фарқли равишда ота-онамнинг рози-ризолиги билан санъатга кириб келганман. Уларнинг тарбияси билан санъатга меҳр қўйганман.

- Мана, орадан йиллар ўтди. Санъатнинг тош йўлларида юриб, унинг метиндан қаттиқ нонини ейман, деб тишларингиз темирдан бўлиб кетди. Танлаган касбингиздан афсусланган пайтларингиз ҳам бўлганми?

- Авваллари бўлмасди, аммо ҳозирги пайтларда тез-тез афсусланиб кетаман. Чунки, санъат қурбонлик талаб қилади. Бизнинг соҳамизда ҳар доим биринчи ўринда иш, кейин эса оила ва фарзанд туради. Болангиз касал бўлиб қолса ҳам, аввало, гастрол, спектакль, кейингина болангиз ёнига югурасиз. Шундай пайтларда эзилиб кетаман. Ҳозир тўғри гапни айтдингиз, санъатнинг тошдан қаттиқ нонини ейман деб тишларим нафақат темирдан бўлиб кетди, балки қийшайиб ҳам кетди. Баъзан театр, дубляж, телевидение, радио қилиб югуриб юриб жуда ҳам чарчаб кетаман. Шунақа пайтларда уйда, уй бекаси бўлиб ўтиришни хоҳлаб қоламан. Аммо бошқа касб эгаси бўлишни хаёлимга ҳам келтирмайман.

Битта-ю битта қизим бор. Исми Моҳларойим. У келажакда қўшиқчи бўлмоқчи. Аммо юқоридаги сабабларга кўра мен унга қаршилик қиляпман. У шу орзусини айтганидан бери қаршилик қилиб келаман.

- Сизни санъатни деб, кечроқ турмушга чиққан, деб эшитганман. Бундан-чи? Афсусланасизми?

- Албатта. Менинг тенгқурларим ҳозир келин олиб, қиз узатган. Набиралар қуршовида буви бўлиб юришибди. Балки, мен ҳам бошқа касбни танлаганимда уч-тўрт фарзандли, қуда-андали бўлиб, уйда набираларим билан ўтирган бўлармидим. Оилавий аҳволим, балки, бутунлай бош-қача бўлармиди.

Гоҳида мана шу кечикиш учун афсусланаман. Гоҳида эса бу ўзим танлаган, ўзим орзу қилган йўл бўлгани учун ҳам кўнаман. Агар бу касбга кимнингдир мажбурлови билан келганимда эди, ўшалардан аламимни олардим.

Шунинг учун ҳам театримизга келган ёш актрисаларга ҳар куни "Тезроқ турмушга чиқ" деб гапиравериб қулоқ-мияларини "еб" ташлайман. "Сени ҳам, касбингни ҳам тушунадиган яхши йигитга турмушга чиқсанг, оила ҳам, иш ҳам ўз ўрнига тушиб кетади", дея насиҳатлар қиламан. Чунки, уларни ҳам мендек кеч қолишларини хоҳламайман. Ахир вақтида менга ҳам ҳеч ким насиҳат қилмаганди. Ёш шогирдларга ҳар доим "Шоҳида Исмоилова, Сайёра Юнусова, Лола Элтоева каби касбдошларимиздек ҳаммасини тенг уддалашга ҳаракат қил, бизга ўхшаб адашиб, кеч қолманглар", деб айтаман.

- Сизни кўпроқ комик ролларда кўрамиз. Бу сизнинг қизиққан жанрингизми ёки режиссёрлар сиздан шу нарсани талаб қилишадими?

- Бу мен қизиққан йўналиш бўлса керак. Чунки мен табиатан хушчақчақ аёлман. Кўпроқ қувноқ кайфиятда бўлишга ҳаракат қиламан. Ҳар бир инсон юрагининг туб-тубида ўзининг дарди, ҳасрати бўлади. Шуни енгиш учун ҳам шунақа хушчақчақ юрсам керак. Лекин ўзим ҳам комик роллар ўйнашни ёқтираман. Шунинг учун менга кўпроқ шундай роллар беришади. Аммо театрда ҳар хил: драматик, трагедик ва комик ролларим бор. Ҳозир кинода ҳам аста-секинлик билан оналар ва қайноналарга ўтдим. Шунинг учун кинода ҳам фақат комик эмас, бошқа жанрларда ҳам образлар яратмоқдаман.

- Ўзингиз она бўлгач, оналикнинг масъулиятини англагач, унинг нақадар машаққатли вазифа эканлигини ҳис этган бўлсангиз керак?

- Дарҳақиқат, "Онанинг кўнгли болада, боланинг кўнгли далада", деганларидек оналик масъулияти анча оғир. Мен ҳам она бўлганим учун ҳар доим кўнглим фарзандимда. Биласизми, аёлни фарзанди кучли қилади. Инсоннинг бошига турли хил кунлар тушади. Шундай пайтларда "боламни ўйлайман". Чиндан ҳам фарзанд инсонни дунёда ушлаб турадиган буюк неъматдир. Фарзандларимиз ҳаётига қувонч ва маъно бағишлайди. Бизларга куч-қудрат ва ишонч беради.

- Юқорида ўзингиз таъкидлаганингиздек, фарзандингизнинг санъаткор бўлишига қаршилик қилиб келасиз. Аммо унинг қайси касбни танлашини хоҳлардингиз?

- Фарзандимнинг келажакда шифокор бўлишини хоҳлайман. Мен театрга энди ишга келган пайтларимда Ўзбекистон халқ артисти Гулчеҳра Жамилованинг катта қизи Асал Хўжаева театримизга кўп келарди. Мен Гулчеҳра опага ҳам, Асалга ҳам жуда ҳавас қилардим. Айниқса, Асалнинг киноларда яратган кўплаб образларини кўриб унга бўлган муҳаббатим янада ортиб борди. Унинг иқтидорига қойил қолардим. У пайтларда мен турмушга чиқмаган пайтим эди. Шунда "Менинг ҳам қизим бўлса-ю, Асалга ўхшаса", деб орзу қилардим. Кейин билсам, Асал актриса эмас, катта шифокор экан. Ўз соҳасида ҳам илмий ишлар қилган. Лекин санъаткорлар оиласида туғилиб ўсгани, томирида санъаткорлар қони оқаётгани учун ҳам роллар ўйнаб турар экан. Менинг қизим ҳам унга ўхшаган катта шифокор бўлса, майли шу билан бирга роллар ўйнаса ҳам рози бўлардим, деганман. Шунинг учун қизимнинг шифокор бўлишини хоҳлайман.

- Газетамизнинг мухлисларига тилакларингиз?

- "Иқбол" газетаси мухлисларига ҳамиша соғлик-омонлик ва оилавий хотиржамлик тилайман. Илоҳим, барча инсонларга севиб-севилиб, кимларгадир керакли бўлиб яшаш бахти насиб этсин.

Феруза ИҚБОЛ суҳбатлашди.