ДУНЁГА МАШҲУР АЁЛЛАР

"МЕН, АЛБАТТА БАХТИМНИ ТОПАМАН"

Инсон бу дунёда яшаркан, нималаргадир эришишга, нималарнидир топишга интилади. Кимдир бахт излайди, кимдир эса тахт. Кимдир бойлик излайди, яна кимдир шон-шуҳрат. Бунга ҳаётимизда мисоллар кўп.

Юрий ва Елена Шараповларнинг никоҳ тўйи дунёга қайғуси билан танилган Чернобил яқинидаги Гомелда бўлиб ўтганди. 1986 йилнинг ёзида рафиқаси фарзанд кутаётгани аён бўлгач, Юрий Викторович оиласини олисларга- Сибирнинг Наган шаҳрига кўчириб кетди. Айнан ўша жойда 1987 йили Маша туғилган. Орадан икки йил ўтгач, улар Сочига кўчиб ўтишади.

... Илк марта кортга қадам босганида Маша эндигина 4 ярим ёшли қизалоқ эди. Машҳур Евгений Кафельников унга илк теннис ракеткасини совға қилган. Машанинг биринчи мураббийи Юрий Юткин ўша пайтларни шундай хотирлайди : "Бу қизалоқнинг зеҳни ўткир бўлиб, мен ниманики ўргатсам барчасини тез ўрганарди. Фикрлаш қобилияти ниҳоятда кучли эди. Ҳозирга қадар уддалаш қийин бўлган зарбаларни ўша пайтдаёқ ўзлаштириб бўлган".

6 ёшида кичкинтой Маша Москвага хизмат сафари билан келиб, ёш спортчиларга маҳорат дарсларидан сабоқ бераётган Мартина Навратилова билан кортга тушади. Катта тенниснинг катта юлдузи ёш иқтидор соҳибасининг иқтидорини дарров илғади. "Бу қиздан ажойиб теннис устаси чиқади, уни Ник Боллетьерининг теннис мактабига беринг", дея Машанинг отасига маслаҳат берди.

ЎТГАН КУНЛАР...

Тил билмай туриб, пулсиз, бирор иш топишга умидсиз, устига-устак ёш гўдак билан океан узра парвоз қилиш кўпчиликка эриш туюлиши ҳақиқат. Аммо Юрий Шарапов, ҳеч иккиланмай кўч-кўронини йиғиштиришга тушди. Мақсадлари, орзу-умидларидан кечиш хаёлида ҳам йўқ. Маша эса жомадонига ўзининг севимли китобларидан кўпроқ жойлаш ҳаракатида. Қани, иложи бўл- са-ю бу тилсиз дўстларининг барчасини олиб кета олса. Афсуски, самолётда юк вазни чегараланган. Қарангки, онасига четга чиқиш учун виза берилмади. Ва ниҳоят, онасининг Америкага боришга рухсатнома қўлига теккунича бир-бирини қувалаб икки йил вақт ўтиб кетди.

Шундай қилиб, 1994 йилнинг айни баҳор палласида ота ва қизга АҚШ ўз бағрини очди. Бу ерда уларнинг мақсадлари битта - Ник Боллетьерининг академиясига кириш. Қизалоқни бу муассасада жуда чиройли кутиб олишди. Иқтидори ва ғайратига тасаннолар айтилиб, маҳорати юқори баҳоланди. Шу боис уни академияда хуш кўришларини, интизор кутишларини билдиришди... фақат... икки йилдан кейин. Маълум бўлишича, академияга 7 ёшлиларни қабул қилишмас экан. Академияга киргунга қадар ўтказган ўша икки йил Маша учун энг оғир дамлар бўлди. Яхшики, отаси ёнида. Улар маслаҳатлашиб, уйга қайтмасликка, қандай бўлмасин, икки йилни сабр билан ўтказишга келишиб олишди. Шундан кейин эски, вайрона бир хонада ижарага яшашни бошлашди. Дадаси кеча-ю кундуз яшаш учун курашади. Нима иш тўғри келса қилишга мажбур. Ахир мусофир жойда яшашнинг ўзи бўладими. Юрий қизининг келажаги учун энг оғир ишлардан ҳам қайтмади. Маша эса ана шу бир хонали каталакдан чиқмай ўтиради. Яхшиям китоблари бор. Кундузлари мутолаа билан ўзини чалғитади. Баъзида отаси қачон ишга кетиб, қачон қайтганини ҳам билмай қолади. Фақат эрталаб турганида совиб қолмаслиги учун кўрпага ўраб қўйилган иссиқ нонуштадан биладики, шўрлик отаси ярим тунда чарчаб-ҳориб келганига қарамай қизи учун овқат тайёрлаб, яна қуёш ётоғидан бош кўтармай туриб ишга кетган. Бу ҳам майли-я, энг ёмони, шу икки йил ичида кўп марта жой алмаштиришларига тўғри келди. Ижара ҳақини тўлолмай, уйдан ҳайдалган кунлари ҳам бўлди. Лекин шунда ҳам улар сабр билан, умид билан, келажакка ишонч билан яшадилар.

Ойнинг ўн беши қоронғу бўлса, ўн беши ёруғ, деганлари ҳақ гап. Ниҳоят, ота-боланинг елкасига офтоб тегди. Машани академияга қабул қилишди. Нурли манзиллар сари илқ сабоқ ва машқлар бошланди. "Ўқиш бошланганида Мария шу қадар нозик, нимжон эдики, кўрган одам ҳайратланарди, - дея хотирлайди Ник Боллетьери. - У 10-11 ёшиданоқ ўз олдига дадил мақсад қўя олган қиз эканлигини англадим. Унинг отаси ажойиб инсон. Машғулотларга қизи билан бирга қатнашиб, менинг айтганларимни ёндафтарига ёзиб борар ва машқларни қизи билан биргаликда бажарарди. Мариянинг спортда юксак чўққиларга эришишида отасининг хизматлари катта".

ҒАЛАБА, ФАҚАТ ҒАЛАБА САРИ

Мария 2001 йилдан катта турнирларда дебют ўйинларини бошлади. 16 ёшида кучли спорт усталарини мағлубиятга учратди. Шулардан бири дунёнинг 8-рақамли ракеткачиси Елена Дементьева устидан ғалабага эришди. Лекин ҳали олдинда янада юксак чўққилар кўзланган. У ана шу юксаклик сари тинимсиз ишлади, машқларда чиниқа борди. Мана, ниҳоят унинг ҳаётида муҳим воқеа вақти келди. "Уимблдон-2004". Ўшанда у эндигина 17 ёш остонасига қадам босган. Нуфузли мусобақанинг финалига унинг ёшидаги спортчиларнинг етиб бориши амримаҳол. Аслида шу мусобақада қатнашишнинг ўзи манаман деган спортчи учун катта шараф. Маша эса турнирда мумкин бўлмаган ишни уддалади. Ҳал қилувчи дақиқаларда америкалик кучли спортчи, дунёнинг биринчи рақамли ракетка устаси Серена Уильямс устидан ғалаба қозонди.

Ўйин тугабоқ атрофидаги олқишлар-у ҳайқириқларга ҳам эътибор бермай чемпион қиз мухлислар сафида ўтирган отаси томон бораркан, тинимсиз йиғларди. Бу унинг севинч ёшлари эди. Юрий Викторовичнинг ўшандаги ҳолатини эса гапирмаса ҳам бўлади. "Биласизми, ўша лаҳзаларда кўз кўриб, қулоқ эшитмаган воқеа бўлганди, - дейди Юрий Шарапов.- Ва ниҳоят барча машаққатлар ортда қолганини ҳис этиб ўзингни қушдай енгил ҳис қиларкансан одам. Жигаргўшамни бағримга босиб, ҳаммаси учун Яратганга шукрона айтдим".

НАФАҚАТ СПОРТДА…

Уимблдондаги муваффақият Шараповани дунёнинг 8-рақамли ракетка устасига айлантирди. Ярим йилдан кейин дунё чемпионати натижаларига кўра, Мария "Йилнинг энг яхши теннисчиси" номини олиб, дунё спорт рейтингининг 4-поғонасига кўтарилди. Спортчи соҳибжамол қиз тез орада америкаликлар қалбидан жой олиб улгурди. Муқовасида унинг фотосурати чоп этилган нуфузли нашрлар қўлдан-қўлга минглаб нусхада тарқалди. Катта-катта компаниялар у билан битим тузиш таклифини билдира бошлашди. У 2005 йили "Форбс" журнали эълон қилган "Дунёнинг энг машҳур инсонлари 100 талиги" рўйхатидан жой олди. Бирдан Мария Шарапова нафақат кучли, балки, дунёнинг энг бой спортчиси эканлиги аён бўлиб қолди.

Ҳаёт бир текис эмас. Унинг фаолиятида юксалишлар ҳам, ютқазишлар ҳам бўлди. Бу боис Шараповани енгилмас спортчи, дея аташмаган. У рақиби устидан ғалаба қозонганида ўзини йўқотиб қўймади, мағлубиятини ҳам сарбаланд қарши олиб, ўз устида тинимсиз ишлади. Шу йилнинг июл ойида у биринчи рақамли ракетка устаси, деган номини қайта тиклади. Унинг иқтидори ва чапдастлигига дунё аҳли яна бир бор лол қолди.

Таниқли спортчи қизнинг яна бир очилмаган қирралари бор. Айни пайтда дунёнинг йирик компанияларнинг "юзи" у. Бундан икки йил муқаддам Nike компанияси билан шартнома тузганди, келишувга асосан 8 йилда 70 миллион доллар даромад топиши кўзда тутилган. Шарапованинг машҳур Sony Ericsson компанияси билан тузган шартномасидан келадиган фойда ҳам ундан кам эмас. Мариянинг ҳисоб жамғармасига яхшигина даромад манбаи - кийим-кечак ишлаб чиқарувчи таниқли Cole Haan бренди. Бу ерда Мария ўзининг либослар намунасини намойиш этади. Nike учун Шарапова спорт кийимлари ўйлаб топади, TAG бренди учун эса - турли русумдаги кўзойнак ва соатлар. Бундан ташқари, Шарапова Tiffany, Prince, Land Rover, Canon ва Evian брендларининг рекламаси билан шуғулланади.

Яқин кунларда Мария ўзи мустақил равишда ширинлик ва қандолат маҳсулотлари ишлаб чиқаришни йўлга қўйди. Ҳа, гўзал, тиришқоқ, спортчи қиз, энди-чи - тадбиркор.

БАХТИЁР ОРЗУЛАР

Қаҳрамонимизнинг спорт, бизнесдаги фаолияти билан танишдик. Хўш, шахсий ҳаётида не гаплар? Ахир у ҳам барча қатори аёллик, бекалик, оналик бахтини орзу қилар албатта? Ҳа, унинг ҳам бу борада орзулари осмон қадар. Ўзига муносиб умр йўлдош, вафодор ёр, энг муҳими, бўлажак фарзанди учун меҳрибон ота бўла оладиган йигит билан тақдир йўлларини боғлаш умидида. Тўғри, унга ҳавас қилганлар кўп. Лекин уларнинг орасидан кўнгил яқинини ҳали топмаган кўринади.

Ойдиной ВАҲОБЖОНОВА.