БАЙРАМ ШУКУҲИ
Андижон шаҳридаги ҳарбий гарнизонда 14 январь - Ватан ҳимоячилари куни муносабати билан "Ўзбекистон Республикаси Қонунчилиги Мудофаа ва хавфсизлик ҳамда Қуролли кучлар қурилиши ва Мудофаа таъминотининг ҳуқуқий асослари" мавзусида тадбир бўлиб ўтди. Унда ҳарбий хизматчилар ва уларнинг оила аъзолари, кенг жамоатчилик вакиллари қатнашдилар.
Тадбирда вилоят ҳокимининг ўринбосари, вилоят хотин-қизлар қўмитасининг раиси М. Юнусова сўз олиб, барчани Ватан ҳимоячилари куни билан қизғин табриклади. Ҳарбий хизматни ўташ шароитларини яхшилаш ҳамда Ватан ҳимоячиларига ва уларнинг оилаларига ҳар томонлама ғамхўрлик кўрсатиш борасида олиб борилаётган кенг кўламли ишлар хусусида тўхталди. Шунингдек, Ўзбекистон Республикаси Олий Мажлиси Сенати аъзоси Фаридахон Араббоева, Андижон давлат тиббиёт институти проректори Саодатхон Ашурова, АДУ ўқитувчиси, филология фанлари номзоди Назокатхон Жалолова ҳамда психология кафедраси мудири Наимахон Халиловалар ҳам сўзга чиқиб, мамлакатимиз хавфсизлигини таъминлаётган, сарҳадларимизни қўриқлаётган мард, жасур ҳарбий аскарларимизни байрам билан қутладилар.
"Соғлом авлод" хайрия жамғармаси вилоят бўлими томонидан ҳарбий хизматчилар ва уларнинг оила аъзоларига байрам совғалари топширилди.
Вилоятимизнинг таниқли санъаткорлари ижросидаги куй- қўшиқлар даврага байрамона кайфият улашди.
З. АБДУЛЛАЕВА.
|