ТАЛАБА ФИКРИ

ЮРТИМИЗГА МУНОСИБ ФАРЗАНД БЎЛАЙЛИК

Мен - мустақиллик фарзандиман. Йилдан-йилга юксалиб, тараққий этиб бораётган озод ва обод юртимиз одамларининг кўксини баланд кўтариб, бахтиёр юришларини кўриб, кўнглим фахр, ифтихорга тўлиб кетади.

Айниқса, ҳамюрт спортчиларимизнинг халқаро мусобақаларда, жаҳон чемпионатларида ғолиб бўлиб, Ватанимиз байроғини боши узра баланд кўтарганида тўлқинланаман, дунёнинг энг тараққий этган давлатларида туриб, тенгқур дўстларим "аъло баҳоларга ўқияпман, дўстлар орттирдим, Ватанни соғиняпман", деб қўнғироқ қилиб қолса, вужудимни ҳаяжон қоплайди.

Шунда Юртбошимизнинг "Ўзбек халқи ҳеч кимдан кам бўлмаган ва ҳеч кимдан кам бўлмайди ҳам!" деган сўзлари ёдимга келади. Шундай юртда туғилиб, ўсганлигимдан, қадим тарихи, буюк келажаги бор шу табаррук заминнинг фарзанди эканлигимдан беҳад қувонаман.

Муқаддас юртим келажаги биз ёшлар қўлида эканлигини англаб, олийгоҳда яхши ўқишга, барча ишларда фаол бўлишга ҳаракат қиламан. Қолаверса, бугунги кунда биз ёшларнинг ўқишимиз, ўз имконият ва салоҳиятимизни тўлақонли юзага чиқаришимиз учун барча шарт-шароитлар яратиб берилган. Хусусан, Андижон машинасозлик институтида ҳам замон талаблари даражасида билим олишимиз учун барча қулайликлар яратилган. Ўқув даргоҳимизда ўз ишининг етук билимдонлари бўлган ўқитувчилар, фанга умрини бахшида этган фидойи олимлар бизларга пухта ва мукаммал таълим бермоқда. Шу боис ҳам институтимизда халқ хўжалигининг турли соҳаларида, айниқса, иқтисодиётимиз ривожида муҳим ўрин тутувчи машинасозлик саноати учун юзлаб етук мутахассислар тайёрланмоқда.

Дарҳақиқат, айни кунда Ўзбекистонимиз автомобиль ишлаб чиқарувчи дунёдаги саноқли давлатлардан бири ҳисобланади. Андижонимизда тайёрланаётган жаҳон андозаларига мос автомобиллар ўзининг сифати, қулайлик ва афзалликлари билан халқаро миқиёсда эътироф топмоқда. Биргина Россия давлатида 2012 йилда сотилган автомобиллар орасида ўзбек автомобиллари ҳам етакчи ўринлардан бирида турганлиги ана шу эътирофнинг ёрқин бир намунасидир.

Бугун биз ёшлар жаҳон ҳамжамияти орасида кундан-кунга нуфузи ортиб бораётган Ватанимизнинг янада тараққий этиши учун астойдил ҳаракат қилайлик. Юксак маънавиятимиз, мустаҳкам имон-эътиқодимиз, фидойилигимиз билан унинг порлоқ келажаги учун хизмат қилайлик. Аъло ўқишимиз, турли хил тадбирларда, жамоат ишларида фаол иштирок этишимиз, муомала, мулоқотдаги маданиятимиз, ахлоқ-одобимиз кўпчиликка ибрат бўлсин.

Муҳтарам президентимиз Ислом Каримов: "Тарихий шон-шуҳратимизни, бугунги кунимизни, жаҳонда тутган ўрнимизни англаб, порлоқ келажакка муносиб соғлом авлодни тарбиялаш ва вояга етказишга эътибор бераётганимиз ҳам бугунги кунимизнинг ёрқин белгисидир" дея айтганларидай бугун мамлакатимиз ёшларига миллий ўзликни англаш, миллий ғурур ва ифтихор, истиқлол ғояларига ҳурмат туйғулари сингдириб борилаётгани бежиз эмас. Чунки миллий ғурури бор, юрт кўрки, камолидан фахрлана оладиган, юксак маънавиятли, собитқадам инсонларгина Ўзбекистонимизнинг эртанги ёруғ истиқболини, буюк келажагини барпо эта оладилар. Шундан хулоса қилиб, мен ҳам ана шундай инсонлар қаторида бўлиш учун бор имкониятларимни ишга соламан, тенгдошларимни, барча ёшларни ана шундай бўлишларига даъват этаман. Энг муҳими, биз она юртимизга муносиб фарзанд бўлайлик.

Дилшодбек ЮСУПОВ,

Андижон машинасозлик институти 1-босқич талабаси.