ҚАДРИЯТ
СУМАЛАК
Ўзбеклар дастурхони доимо тўкин-сочин.Ноз-неъматларга тўла.Сумалак эса дастурхон кўрки, зийнати. У ҳамиша дастурхон тўрида.
Сумалак халқимизнинг энг азиз, энг муқаддас таоми. У қадим-қадимдан ардоқланиб келинади, эъзозланади. Ер ўчоққа тинимсиз олов ёқилади. Дошқозон биқирлаб қайнайди.Узун сопли капгир қозонда тинимсиз айланади, айланаверади. Айни шу дамлар энг бахтиёр, энг унутилмасдир. Яхшилик ният қилинади, тинчлик - омонлик сўралади.Орзулар ижобат бўладиган кун - бу кун.
Қозон бошида кариялар онахонлар бош-қош бўлишади. Ҳеч ким бекор турмайди. Ҳаракатда-баракат, дейишади шу куни улар. Кимдир сув келтиради, яна кимдир ўчоққа ўтин ташлайди. Болалар чопқиллаб-чопқиллаб ўйнашади. Қизлар хурсандчиликларидан сочларига тол баргларидан жамалаклар тақишади. Йигитлар қизларга пинхона боқишади. Кўзлар сўзлашади. Сумалакни соғинган кўнгиллар ўйин-кулгуларга ошиқишади. Чилдирма чалинади, лапарлар, ашулалар дилларга хузур бағишлайди. Ўйин-кулгу тонггача давом этади. Сумалакли қозон бошида аразу-гиналар унутилади. Одамийлик,меҳр-муҳаббат, қадр-қиммат, иззат-икром, ҳурмат туйғулари жўш уради.
Эрта тонг. Сумалак очилади. Пиёлаларга, сопол косаларга, турли гулли чинниларга қуйилади. Кексаларга, ота-оналарга, қариндошларга, беморларга улашилади. Ҳатто кўчадаги нотанишлар ҳам сумалаксиз қолишмайди...
Сумалак-яхшилар оши, яхшилик оши, яхшиликдан нишона ҳамиша.
Абдураҳим БОЗОРБОЕВ,
Марҳамат тумани.
|