МАЪМУРОБОДЛИК ҚИЗЛАР ЗАФАРИ

Қўрғонтепа туманида 1997-1999 йилларда туғилган қизлар ўртасида қўл тўпи бўйича вилоят очиқ турнири бўлиб ўтди. "Обод турмуш йили"га бағишланган бу турнирда шаҳар ва туманлардан жамоалар қатнашдилар.

Турнирнинг Маъмуробод қишлоғида ўтказилиши бежиз эмас. Чунки қишлоқнинг гандболчи қизлари вилоят терма жамоаси асосини ташкил этади. Улар ўтган йили Навоий вилоятида ўтказилган "Умид ниҳоллари" спорт ўйинларининг республика финал босқичида фахрли 2-ўринни эгаллашиб, совриндорлар орасидан муносиб жой олдилар.

Майдон эгалари ҳисобланган маъмурободлик қизлар маҳорат бобида устун эканликларини кўрсатди. Улар турнирда иккита жамоа бўлиб қатнашдилар. Ўтказилган учрашувларда "Маъмуробод-1" жамоаси барча рақибларидан устун келиб, турнир ғолиби бўлди.

Асака тумани гандболчи қизларига 2-ўрин, 3-ўрин эса "Маъмуробод-2" жамоасига насиб этди.

Ғолиб ва совриндорлар диплом ва эсдалик совғалар билан тақдирландилар.

М. КАРИМОВ.