ҲАЛОВАТ ҚЎРҒОНИ
Оилавий ҳаётнинг ширинлиги, гўзаллиги, давомийлиги эр-хотиннинг бир мақсад сари интилишларига, меҳр-муҳаббати ва бир-бирига ҳамдард бўлишларига боғлиқ. Турмуш ўртоғим (раҳматли) Ҳомиджон ака билан 50 йилдан ортиқ аҳилликда яшадик. Илм изладик. Турмушнинг қийинчиликларини бирга енгишга ҳаракат қилдик. Мен ҳам 40 йилдан ортиқ АДТПИда катта ўқитувчи бўлиб ишлаб, нафақага чиқдим. Ҳомиджон ака математика фанининг билимдони эди. У киши билан беш нафар фарзандни камолга етказиб, қаторга қўшдик.
Қайнонам ҳам илмни тушунган, маърифатли аёл эди. Бизни ўқиб, ишлашимиз учун кенг шароит яратиб берган, болаларимизни оёққа турғизишимизга катта ёрдам кўрсатган.
Фарзандларимизнинг ҳаммалари: Зафаржон, Яйрахон, Сирожиддин, Хусниддин, Ҳумоюн олий маълумотли мутахассислар бўлишди. Чекилган заҳматлар, машаққатлар ортда қолди. Бугун 12 нафар набира, 4 нафар чеварам атрофимда парвона. Ҳавас қилса арзийдиган ўғил-қизларим, келинларим, куёвларим бор.
Яхшиликнинг умри боқий бўларкан. Аҳиллик эса ҳаловат қўрғони бўлган оилани мустаҳкамларкан. Буни ҳаётим мисолида кўриб, амин бўлдим.
Ҳабибахон ая ТОЛИБОВА,
намунали оила бекаси.
|