ШИФОКОР МАСЛАҲАТИ

СОҒЛИҒИНГИЗГА БЕПАРВО БЎЛМАНГ

Аёллар кўкрак бези саратони хавфли хасталиклардан бири ҳисобланади. Бунда аёлларнинг кўкрак безида шиш пайдо бўлади. Шиш борган сари катталашиб, оғрийди. Ярага айланган, қўлтиқ ости лимфа тугунлари катталашади, ярадан қон оқа бошлайди.

Шу тариқа беморнинг аҳволи ёмонлашиб боради. Касаллик аломатлари пайдо бўлган аёл дарҳол мутахассис шифокорга мурожаат қилиши лозим. Бу хасталикнинг кучайиб кетишининг олдини олади ва даволаш имконини беради.

Афсуски, баъзилар кўкрак безидаги шишлар ўз-ўзидан йўқолиб кетади, деб умид қилишади ва ҳар хил дамламалар ичишади, ўз билганича даволанишади ёки эътиборсиз бўлишади. Хасталик кучайиб, шифокор қабулига келганларида эса кеч бўлади.

Агар аёллар доимий равишда профилактик кўриклардан ўтиб туришганида ва кўкрак безидаги шишни сезган заҳотиёқ шифокорга борганларида эди, вақтида даво чоралари кўриларди. Бу касаллик қанча эрта аниқланса, беморни даволаш шунча осон кечади. Шунинг учун мутахассислар томонидан, аёлларга навбатдаги хайздан сўнгги уч ва еттинчи кунлари шифокорга учраб ўзларини текширтиришлари тавсия этилади.

Бир неча йиллардан буён ҳар йили поликлиника ва диспансер профилактик кўрикларида кўкрак безларининг флюрографияси ва флюромаммогра-фияси ўтказилмоқда. 35 ёшдан ошган ҳар бир аёл ўзини соғлом ҳис қилса-да, бу хил текширувларнинг ғоят муҳим эканлигини тушунишлари керак. Текширув натижасида кўкрак безида кечаётган патологик ўзгаришларни аниқлаш мумкин. Улар структурасидаги асимметрия (тенг эмаслик), майда тугунсимон шишлар, бу ёки у касалликнинг белгиси бўлиши мумкин.

Ҳозирги замон тиббиёти кўкрак безининг ҳар қандай касаллигини, ҳатто ёмон сифатли ўсмаларни ҳам эрта аниқлай олиш имкониятига эга. Кўкрак бези ўсмаларининг олдини олиш учун асосан, ҳомиладор бўлмаган ва туғмаган аёллар ҳушёр бўлишлари керак.

Вилоятимиз онкология диспансери қошидаги вилоятлараро маммологик марказда кўкрак безларининг турли касалликлари билан оғриган аёллар текширилиб, даволанади. Мазкур диспансернинг малакали шифокорлари бир неча йиллардан буён беморларга малакали хизмат кўрсатиб келмоқдалар.

Азиз аёллар! Саломатлигингизга бепарво бўлманг. Ўз вақтида диспансер кўригидан ўтиб турсангиз, соғлиғингиз ҳақида қайғурсангиз, ҳеч қандай касаллик Сизга раҳна сололмайди. Буни асло унутманг!

Низомиддин САТТИБОЕВ,

Андижон вилоят онкология диспансери, 5-жарроҳлик бўлими мудири,

Қаҳрамонжон ЖЎРАБОЕВ,

врач-онколог,

Тоҳиржон БУРУНДУКОВ,

АДТИ талабаси.