МУЛОҲАЗА

БУРЧ

Ҳалоллик, тўғрилик, одамлар ҳаққига ҳиёнат қилмасликда ҳикмат кўп. Қинғир иш эса бир кун фош бўлмай қолмайди.

Телевидение орқали вақти-вақти билан коммунал тўловлари бўйича танқидий кўрсатувлар бериб борилмоқда. Шундай кўрсатувларда бир хонадоннинг эгалари табиий газдан ноқонуний фойдаланиб, новвойчилик билан шуғулланаётгани ҳақида гап кетди. Қарзни талаб қилган тегишли соҳа вакилларига уй эгаси икки-уч кунга муддат сўраб, шахсан ўзи идорага учрашини ва барча қарз ва тўловларни амалга оширишини айтди. Бироқ вазиятга кўра уйда боқилаётган бир бош сигирни хатлов қилиб давлат ҳисобига ўтказиш учун ҳайвонни олиб чиқиб кетишаётганда, уй эгаси уйдан пул олиб чиқиб, қарзларини тўлиқ тўлаб, ҳайвонни олиб қолди.

Шу ўринда савол туғилади, фойдаланилган неъматлар учун ўз вақтида тўлов қилмасдан, эл-юрт олдида шарманда бўлишгача етиш шартмиди? Унинг ноқонуний ҳаракатларини ким оқлайди. Энди мулоҳаза қилиб кўринг-чи, қинғир йўл билан топилган луқма ҳалолми?

Киши қалби тўғриликка эш бўлса, унга берилган неъматлар қадрига етса, тежаб-тергаб фойдаланса, ҳаёти тинч, қалби хотиржам яшайдику!

Кўпчиликни ўйлантирадиган исрофгарчиликнинг яна бири ичимлик сувининг ишлатилишидир. Аксарият хонадонларнинг ташқарисида ичимлик суви крани мавжуд бўлса-да, доимо очиқ туради ва ундан сув беҳуда оқиб ётади. Керак маҳалда очиб ишлатиб, сўнг беркитиб қўйиш ҳақида бирор кимса ўйламайди.

Айтингчи, бунинг уволи кимга уради? Албатта кўпчиликка! "Бирники мингга, мингники туманга" деган ибратли гап бежиз айтилмаган.

Дунё ўткинчи. Инсон доим ёруғ юз билан хотиржам умр кечириши учун унга берилаётган неъматлардан унумли фойдаланиб, зиммасидаги бурчларини вақтида бажариб, исрофгарчиликка йўл қўймасдан яшашга ўрганмоғи керак.

Моддий имкон топганда зиммамиздаги қарзлардан фориғ бўлишга интилайлик. Исрофгарчиликка чек қўяйлик. Ахир келажак авлодлар биздан намуна олади.

Абдуғулом

АБДУЛАХАТОВ,

Избоскан тумани.