ТАДБИР

"ЁШ ИЖОДКОРЛАР" КЎРГАЗМАСИ

Бугунги кунда барча ўқув муассасаларида иқтидорли ёшларни қўллаб-қувватлаш борасида кенг кўламли ишлар олиб борилмоқда. Бу каби тадбирлар ёш истеъдодларни юзага чиқаришда муҳим аҳамият касб этмоқда. Ана шундай тадбирлардан бири Андижон шаҳридаги 4-умумтаълим мактабида бўлиб ўтди.

"Шифокор" маҳалла фуқаролар йиғини ташаббуси билан ташкил этилган "Ёш ижодкорлар" номли расмлар кўргазмаси ҳамда кўрик-танлови кўтаринки руҳда ўтказилди. Танловда Андижон шаҳридаги иқтидорли болалар ва 4-умумтаълим мактабининг рассомликка қизиқувчи ўқувчилари ўзларининг ижод намуналари билан иштирок этдилар. Бир-биридан чиройли расмлар, истеъдод ғунчаларининг жажжи меҳнатлари ҳакамлар томонидан юқори баҳоланди.

Ўзбекистон Бадиий Академияси Андижон ихтисослаштирилган санъат мактаб-интернатининг 7-синф ўқувчиси Равшанбек Худойбердиев "Энг яхши расмлар" муаллифи сифатида танлов ғолиби деб топилди. Ёш иқтидор соҳибининг ижодий ишлари муносиб баҳоланиб, эсдалик совға ва диплом билан тақдирланди.

Тадбир сўнггида 4-умумтаълим мактаби директори Паризода Артиқова сўз олиб, юртимиз келажагининг эгалари бўлган иқтидорли ёшларни қўллаб-қувватлаш учун мактаб маъмурияти томонидан зарур барча ёрдам кўрсатилишини, хусусан, Равшанбек Худойбердиев сингари истеъдод соҳиблари келажакда юртимизга муносиб хизмат қиладиган инсонлар бўлиб камол топишларини алоҳида таъкидлади.

Тадбир барча иштирокчиларда катта таассурот қолдирди.

Зилола РАҲМОНОВА.