АЁЛЛАР СПОРТ ФЕСТИВАЛИ
Шаҳрихон тумани хотин-қизлар қўмитаси, маданият ва спорт ишлари бўлими, туман тиббиёт бирлашмаси, "Маҳалла" ҳайрия жамоат фонди, "Камолот" ЁИҲ, "Соғлом авлод учун" ҳайрия жамғармаси туман бўлимлари ҳамкорлигида "Аёллар спорт фестивали" ташкил этилди. Фестивалда 76 та маҳалла фуқаролар йиғинидан 400 дан ортиқ хотин-қизлар иштирок этиб, ғолиблик учун ўзаро баҳс олиб бордилар.
Қизғин ўтган беллашувларда 100 ва 400 метрларга югуриш бўйича Тегирмонбоши МФЙ раиси, 52 ёшли Фаридахон Маматқулова ва уй бекаси Дилдорахон Абдуллаевалар ғолибликни эгалладилар. Стол тенниси беллашувида Назармаҳрам маҳалласидан Фаридахон Саттарова ҳамда Соқиобод МФЙ котибаси Муборак Абдураҳмоноваларга тенг келадигани топилмади. Бадиий гимнастика баҳсларида Хўжаобод маҳалласида яшовчи уй бекаси Муножатхон Сулаймонова, Абдубий МФЙдан Насибахон Шариповалар 1- ва 2-ўринларни эгалладилар. Волейбол мусобақасида эса Найнаво ва Янгийўл ҚФЙ жамоалари ғолиб чиқдилар.
Ғолибларни вилоят ҳокимининг маънавий-маърифий ишлар бўйича ёрдамчиси Абдуваҳоб Нурматов табриклаб, эсдалик совғалари ҳамда фахрий ёрлиқлар топширди.
|