КАСБИДАН БАХТ ТОПГАН АЁЛ
Орамизда ўз яқинидаги кишиларни доимо яхшиликка, эзгуликка чорловчи меҳрибон инсонлар кўп. Уларга қараб ҳаётни аста-секин англаб борасан, уларнинг ҳаёт йўли сен учун бир китоб вазифасини ўтайди.
Минурахон Мамажонова ҳам атрофидаги одамларга ҳамиша меҳр билан жавоб қайтарадиган, ўз ёрдамини ҳеч кимдан аямайдиган аёллардан. У Бўз туманидаги З. М. Бобур номли қишлоқда улғайиб, болалигидан ота-онасининг ўз касбига бўлган муҳаббатини кўриб, унда ҳам муаллимликка қизиқиш пайдо бўлади.
Оиладаги таълим-тарбия уни мақсад сари катта қадамлар билан олдинга юришга ўргатади. У тумандаги 7-умумтаълим мактабини битиргач, Андижон давлат педагогика институти (Ҳозирги Андижон давлат университети)нинг тарих-ҳуқуқшунослик факультетига ўқишга киради. У ерни тамомлаб, ўзи билим олган мактабда ўқувчиларга тарих фанидан сабоқ берди.
Айни пайтда эса Шаҳрихон туманидаги 46-умумтаълим мактабда тарих ва миллий истиқлол фанидан дарс бериб келмоқда. Мактабдаги 23 йиллик фаолияти давомида ёш авлодни билимли, тиришқоқ, интилувчан, зукко қилиб тарбиялашга ҳаракат қилди. Ўқувчиларнинг қандай камчиликлари бўлса, ота-оналари билан маслаҳатлашиб, муаммоларга ечим излади.
- Оилам тинч, юртимиз фаровон, севимли касбим бор, - дейди Минурахон опа. - Ўзимни, албатта, бахтли аёлман, деб айта оламан. Бўш қолдим дегунча, бадиий китоблар мутолаа қиламан, уй юмушларида келинларимга ёрдам бераман.
Опа ҳаётдаги барча орзу-мақсадларига эришган. Сабаби, турмуш ўртоғи Абдувоҳид Мамажонов билан узоқ йиллар аҳилликда яшаб, фарзандларини комил инсонлар қаторига қўшди, уларни ўқитди. Меҳнатлари самараси ўлароқ, эл-юртда обрў, эътибор топди. Буларнинг барига ҳалоллиги, меҳнати билан эришди.
Ўзбек аёлларининг бахти ҳам асли шундадир. Зеро, ҳаётда, жамиятда ўз ўрнига эга бўлиш аёл учун катта бахтдир.
Миролим
ИСАЖОНОВ.
|