ОДОБ

ОДОБНИНГ БОШИ - САЛОМ

Одатдаги кунларнинг бирида бекатда автобус кутиб ўтиргандим. Ёнимда бир нуроний отахон ҳам бор эди. У билан суҳбатлашиб ўтирсак, олдимиздан европача кийиниб, сочини сариқ рангга бўяб олган, қулоғидаги наушникдан таралаётган куйга ҳар замонда қўлларини қимирлатиб қўяётган ёшгина бир қиз "сомалейкум", деб ўтиб кетди. Отахон бир қизга, бир менга қараб деди:

- Қулоғим оғирроқ болам, анави қиз бизга бир нима дедими?

- Салом беряпти, отахон, - деб қўя қолдим уни ранжитгим келмай.

- Юришидан тарбия кўрмаган қизга ўхшаркан-ку, ҳеч бўлмаса, салом беришни биларкан, ҳайрият...

Кишининг кийиниши, юриш-туриши сўзлашиши ва ҳатто, саломлашишига қараб, унинг қандай оилада тарбия топганига баҳо берилади. "Ассалому алайкум" сўзи сизга соғлик-саломатлик тилайман, деган маънони билдиради.

Бир-икки ёшга тўлган болакайнинг тили чиқиб, сўзларни илк бор талаффуз қила бошлаганида саломлашиш одоби ҳам яқинлари томонидан ўргатилади. Кейинчалик бу боғчада, мактабда давом этади. Ҳар куни кўча-кўйда қўлини кўксига қўйиб, очиқ чеҳралик билан "Ассалому алайкум", дея кўришадиган ўнлаб одамларга дуч келамиз. Булар бизга албатта, ўрнак бўлиши керак. Юқоридаги хунук ҳолатларга эътиборсизлик бундан каттароқларини юзага келтириши мумкин. Шунинг учун ҳам катталарга айтардик-ки, ёшларни тартибга чақиришдан чарчаманглар.

Миролим ИСАЖОНОВ.