БУГУННИНГ ГАПИ

"ОДНОКЛАССНИКИ"НИ ЗАБТ ЭТАЁТГАН ҚИЗЛАР

ЁҲУД "ОДНО"ДА ҚИЗЛАР ЎЗ БАХТИНИ ТОПИШЯПТИМИ?

Бугун давримиз шиддат билан ривожланиб бормоқда, айниқса, техника, технология соҳаси мислсиз тараққий этмоқда. Бу албатта, кишилик жамиятига ўзининг қатор ижобий ва салбий таъсирини кўрсатаётгани айни ҳақиқат.

Бу жараённи нималарда кўриш мумкин? Маълумки, техника, ахборот коммуникация технологиялари тараққиёти инсонлар учун жуда кенг имкониятлар, катта қулайликлар яратиб берди. Бугунги кунда энг сўнгги русумдаги компьютерлар, уяли алоқа воситалари, аниқроқ қилиб айтадиган бўлсак, қўл телефонлари кишиларнинг оғирини енгил, узоғини яқин қилмоқда, интернет тармоғи эса дунё янгиликларидан тезкор бохабар бўлишда жуда қўл келмоқда.

Танганинг иккинчи томони бўлгани каби ана шу тараққиёт, илғор технологиялардан фойдаланиш ортидан инсоният турли маънавий таҳдидларга, таназзулга рўбаро келмоқда. Бу эса унинг ортидан бойлик орттиришни, ўз манфаатларини барчадан устун қўйишни мақсад қилиб олган тоифа кишилари учун қурол бўлиб хизмат қилмоқда.

Айни кунда мамлакатимизда ҳам ана шу муаммо долзарб бўлиб қолмоқда. Сир эмаски, турли компьютер дастурлари, интернет, видео ўйинлар ёшлар ҳаётининг ажралмас қисмига айланиб боряпти. Айниқса, интернетдан фойдаланувчилар сафи кундан-кунга ўсмоқда. Юқорида айтганимиздек, интернет тармоғи орқали жуда кўп маълумотлар олишимиз, дунёнинг турли бурчакларида бўлаётган воқеа-ҳодисалар билан тезкор танишишимиз мумкин. Бироқ, ундан тўғри фойдаланиш масаласи бизни жиддий ташвишга солади.

Интернет тармоғидан самарали фойдалана олаётганлар кўпчиликни ташкил этса-да, вақтини бемаъни ўтказиш, кўнгилхушлик учун фойдаланаётганлар ҳам орамизда йўқ эмас. Шу ўринда интернет сайтлари орасида кенг тарқалган "синфдошлар" яъни "Одноклассники" сайти асирига айланиб қолаётган ёшлар хусусида сўз юритсак. Ўзининг машҳурлиги ва кенг тарқалганлиги билан оммалашиб борётган ушбу сайт бизга нима беряпти?! Унинг доимий мижозига айланаётган ёшлар ундан қандай манфаат кўрмоқда? Унинг ибрат оладиган жиҳатлари борми? Ёшларимизнинг билим савиясини, дунёқарашини бойитишга хизмат қиляптими? Афсуски, бу каби саволларга ижобий жавоб топа олмаймиз.

Енгил фикр юритадиган айрим ёшларимиз ана шулар ҳақида ўйлаб ҳам кўрмасдан, унинг тўрига илиниб қолмоқда. Айниқса, "Одноклассники"ни қизлар забт этаётгани жуда ачинарлидир.

Айтиш жоизки, мазкур сайтда очилган профиллар, расмларнинг аксарияти кимларнингдир найранглари, сохта ва ёлғон кўринишлардир. Наҳот, ёшларимиз буни англаб етмаётган бўлса?. Масалан, унда бир киши исми, фамилиясини ўзгартириб, ўзига қандайдир "тахаллус"лар қўйиб, бир неча профилни яратиб олган. Уларнинг бирида йигит, бирида эса қиз бола вазифасини ўтаётган бу "шунқорлар"нинг кимлиги ҳам номаълум.

Турли диний оқимлар, қизларни ёмон йўлларга бошлаш, ёшларни ёт ғоялар таъсирига тушиб қолиши учун кенг имкон яратаётган ушбу сайтдан ғараз ниятли кимсалар кенг фойдаланаётганлиги туфайли уларнинг , сайт орқали ёшларимизга тасир кўрсатишидан эҳтиёт бўлишимиз лозим. "Одно"даги ёзишмаларга кўзингиз тушса, унга маълумотлар киритаётган айрим ўзбек қизлари ибо-ҳаёни унутганлигининг гувоҳи бўласиз. Ор-номусни унутиб, беҳаёларча тушган суратларини намойиш этаётган қизлар наҳотки ўз шаънини ўйламаса? Сайт профилларидаги "муҳокамалар" бўлимида ёзилган сўзларга илон пўст ташлайди.

Ушбу сайтнинг ижобий томонларини ҳам излаб кўрдик. Унда балки айрим йигит-қизлар дўст орттираётгандир, кимдир олисдаги қадрдонлари билан суҳбатлашаётгандир. Берилаётган турли эълонлар кимгадир фойда келтираётган бўлиши мумкин. Аммо, ўзбек ёшлари учун фойдадан кўра зарари кўп бўлаётгани, халқимизга хос одоб-ахлоқ, тарбия мезонларига зид эканлиги, у вақтлар ўтиб тузатиб бўлмас маънавий жароҳатлар келтириши мумкинлиги бизни жиддий ташвишга солиши керак.

Яқиндагина "одноклассники" билан боғлиқ бўлиб ўтган бир воқеани айтиб ўтмоқчиман. Йигит ва қиз "одно"да танишиб, суҳбатлашиб юришди. Йигит қизни ўз профилига "умр йўлдош" сифатида белгилаб, муносабатларни чуқурлаштирди, бир-бирлари билан "очиқ" гаплашадиган бўлишди. Шу тариқа бир неча ойлардан сўнг улар кўришишга келишишди. Ўз бахтини топиш илинжида учрашув жойига келган қиз карахт бўлиб қолди. Учрашув жойида ўзининг яқин қариндоши турар эди. Шундагина улар қандай жирканч йўлга кирганликларини англаб етдилар.

"Одно"да бу каби ҳолатлар сон-саноқсиз. Ёшларимиз, айниқса, қизлар улардан тегишли ҳулоса чиқариб олишлари керак. Ахир бу йўл билан ўз бахтини топишга интилиш ўтакетган худбинликдан бошқа нарса эмас.

Азиз қизларжон! Наҳотки, ана шундай рўёга ишонсангиз. Биз хаё-ибони, ор-номусни ўзига либос қилиб олган ўзбек аёли шаънига доғ туширмайлик. Интернетдаги маънавиятимизга таҳдид солувчи сайтларга кириб, вақтимизни беҳуда сарфлагандан кўра, китоб ўқийлик, илм олайлик. Ҳеч бўлмаса ҳунар ўрганиб, юртимиз равнақига ўз ҳиссамизни қўшишга интилайлик. Ота-оналарга айтадиган гапимиз эса фарзандларингизни ёшлик, қизиққонлик қилиб ахлоқсизлик ботқоғига ботишидан сақланг, уларни доимо назоратда тутинг.

Сожида САИДОВА.