МЕН ҚОМУСИМНИ ҲИМОЯ ҚИЛАМАН

42-модда. "Ҳар ким билим олиш ҳуқуқига эга. Бепул умумий таълим олиш давлат томонидан кафолатланади. Мактаб ишлари давлат назоратидадир."

Констутуциямизда айтилган ушбу жумлаларнинг ўзидаёқ мамлакатимизда биз ёшларга яратилган имкониятлар чек-чегарасиз эканлиги ўз аксини топган. Энг муҳими, бизда таълим олиш бепул. Кўплаб ҳорижий давлатларда таълим олиш пуллик йўлга қўйилган. Бу дегани бойларнинг болалари ўқийди, қолган 50-60 фоиз болалар ўзлари хоҳлагандек билим олиш имкониятига эга эмаслар. Шукрки, бундай ҳаёт бизга бегона. Мажбурий таълим жорий этилганлиги эса биз ёшларни ҳар қандай шароитда ҳам билимли бўлиб улғайишимизга имкон беради.

Ҳар ўқув йилида "Билимлар беллашуви"нинг ўтказилиши, биз сингари ўқувчиларнинг билимларини чархлайди. Мен ҳам 2010-2012-ўқув йилларида биология фанидан "Билимлар беллашуви"да вилоятда 1-ўринни эгаллаб, республика босқичида қатнашдим ва қатор имтиёзларни қўлга киритдим. Энг муҳими, буларнинг барчаси бепул. Бунинг учун яхши ўқиб, пухта билим эгаллаш кифоя.

Бундан кўриниб турибдики, биз ёшларга берилган бундай имкониятлар Конституциямизда қайд этилган. Мен Конституция байрами арафасида биринчи курс талабалари ўртасида ўтказилган "Мен қомусимни ҳимоя қиламан" иншолар танловида биз ёшларга берилаётган мана шу имкон, имтиёзлар ҳақида ғурурланиб ёзиб, 1-ўринни эгалладим. Биз ёшлар шундай юртда яшаётганлигимиздан фахрланамиз. Бизга кенг имкониятлар бераётган қомусимизни ҳамиша ҳимоя қиламиз.

Баркамол АБДУСАМАТОВ,

Андижон тиббиёт коллежи

ўқувчиси.