ФИКР
ҲУНАРДАН УНАР ТОЛЕ
Халқимизда йигит кишига етмиш, қиз болага қирқ ҳунар оз, деган ҳикматли ибора бор. Бежиз айтилмаган ушбу ҳикматда гап кўп. "Ўн бармоғида ўнта ҳунари бор" дея мақталгувчи уддабурон кишиларга ҳамма ҳавас билан қараши шубҳасиз. Ҳаётимизнинг ҳар қадамида зарур бўлган ҳунарларни эгаллаш, улардан бохабар бўлиш баркамоллик, мукаммаллик нишонаси саналади.
Уй-рўзғор ишларида, маҳалла-кўй юмушларида, ўқишу иш жойларида дуч келадиган минг турфа муаммолар ечими ҳам ҳунар билгувчида экани табиий. Шунинг учун ҳам у ёки бу ҳунарни қунт билан ўрганиш лозим. "Қунт ила ўрган ҳунар, ҳунардан ризқинг унар" деб бекор айтмаганлар. Зеҳн ва ҳафсала билан қилинган ғайрат, вақтни беҳуда сарфламай ўрганилган ҳунар бир куни шаксиз ўзингизга асқотади.
Йигит кишининг устачилик, созловчилик, ҳайдовчилик каби кундалик ҳаётимизда доимо керак бўладиган ҳунарларни эгаллаши мақсадга мувофиқ бўлса, қизларимизнинг эса чеварчилик, пазандачилик, дўппидўзлик, зардўзлик сингари энг зарур ҳунарларни билиши ўзи учун ҳам, оиласи учун ҳам жуда фойдалидир.
Ҳунарли киши ҳар ерда ўз нонини, ризқини топади, хорлик кўрмайди. Келинг, бугун ёшларимизга ўқиш ва билим олишлари билан бир қаторда кундалик ҳаётимизда зарур ва керак бўлгувчи ҳунарларни эгаллаши учун ҳам замин яратайлик.
Дилбар ҚОСИМОВА,
АДУ қошидаги 2-академик лицейнинг бошланғич хотин-қизлар ташкилоти раиси.
|