ТИНЧЛИК, ОСОЙИШТАЛИК - ЭНГ УЛУҒ НЕЪМАТ

Инсоният ҳаётида турли мафкура ва маслаклар ўртасидаги зиддият ва қарама-қаршиликлар борлиги боис, инсонлар ўртасида ўзаро келишмовчиликлар, нотинчликлар юзага келиб турган.

Тарихдан маълумки, ҳамма даврларда давлатнинг ривожланиши, қай даражада тараққий топиши жамиятнинг фаровон ва осойишта ҳаёт кечиришига боғлиқ бўлган. Ана шу тинчлик, осойишталикни сақлаш эса кишиларнинг хатти-ҳаракатига, маънавиятига боғлиқдир.

Ислом, хусусан, Қуръони Карим таълимотига кўра, мусулмон киши ҳар бир хатти-ҳаракати учун Парвардигор олдида масъулдир. У берилган умри давомида ҳалол ва адолатли бўлиши, ожиз ва муҳтож кишиларни ҳимоя қилиши, уларга раҳм-шафқат кўрсатиши, ер юзида бузғунчилик ҳамда ёмон иллатларга қарши туриши лозим.

Аллоҳ таоло марҳамат қилади: Эй имон келтирганлар! Исломга тўлалигича киринг. Ва шайтоннинг изидан эргашманг. Албатта, у сизга очиқ-ойдин душмандир ("Бақара" сураси, 208-оят).

Тинчлик энг олий неъмат эканлигини дунёдаги барча халқлар бирдек эътироф этади. Динимизда эса тинчлик - инсон қалбининг хотиржамлигидан бошланади. Бу хотиржамлик инсонга, кейин унинг оиласига кўчади. Оиладан эса қўни-қўшни, маҳалла-кўй ҳамда қариндош-уруғлар ўртасидаги муносабатга ўтади. Сўнгра бунинг оқибатида жамиятдаги ҳамжиҳатлик мустаҳкамланади. Ҳар бир кишининг, халқнинг тинч ва фаровон бўлиши учун исломда қатор вазифалар белгилаб қўйилган. Инсонлар, аввало, бир-бирларини ҳурмат қилишлари, катта-ю кичик бирдек эътиборга лойиқ эканлигини унутмаслик, бир-бирларини тушунишлари, ҳамжиҳатликда, аҳил бўлиб турмуш кечиришлари керак.

Жаноб Расули Акрам (с.а.в) муборак ҳадисларида айтадиларки: "Икки неъмат борки, кўпчилик инсонлар унинг қадрига етмайдилар. У хотиржамлик ва сиҳат-саломатликдир".

Инсонда хотиржамлик бўлмас экан, кўнглига ҳеч нарса сиғмайди. Агар киши соғлом бўлмаса, унга хурсандчилик асло татимайди. Ҳадисда айтилганидек, тинчлик ва саломатлик инсон учун тенгсиз неъматлардан бири эканлигига асло шубҳа йўқ.

Юртимизда турли хил миллатлар, элатлар истиқомат қилади. Ҳар бир миллат ва элатнинг урф-одатлари, қадриятлари, ўзига хос турмуш тарзи қонун томонидан ҳимоя қилиниши инсоннинг обрўсини, шаъни ва қадр-қимматини юксак даражага кўтаради.

Шу ўринда миллатлараро сиёсат олий даражада олиб борилаётган, ана шундай бағрикенглик, инсоний қадриятлар улуғланаётган юртимизда яшаётган турли миллат вакилларининг бир-бирлари билан дўстона муносабатда бўлиши, айниқса, улар ўртасида қуда-андачилик ришталари боғланиб, яқин қариндош бўлиб яшашлари, бундай муносабатлар ўзаро дўстлик, меҳр-муҳаббат туйғуларини мустаҳкамлашга хизмат қилаётганлигини фахр билан айтишимиз керак. Бу энг аввало, шу юртда тинчлик-хотиржамлик ҳукм суришининг муҳим омили бўлмоқда.

Аммо орамизда айрим нияти қора, бошқаларни тинч яшаётганини кўра олмаётган, аҳоли тинчлигига раҳна солишга уринаётган кимсаларнинг борлиги бизни ташвишга солади. Шу юртда яшаб туриб, ватанига, юртдошларига, уларнинг осойишталигига қарши иш қилиш ҳеч бир динда айтилмаган. Бундай кишилар улкан гуноҳ қилаётганликларини англаб олишлари керак.

Ўзбекистонимизда миллатлараро бирдамлик ҳамиша устувор ва барқарор бўлган. Шу боис ҳам тинчлигимизга раҳна солувчилар бизнинг ҳамжиҳатлигимизни ҳеч қачон буза олмайдилар. Ёмон ниятли кимсаларнинг қилаётган ишлари, тақдири алал оқибат таназзулга юз тутиши муқаррар. Зеро, ҳар кимса фоний дунёда ўз қилмиши учун бир кун келиб жазо олади, охиратда эса Аллоҳнинг қаҳрига учраши аниқ.

Кундан кунга юксалиб, обод бўлаётган Ўзбекистонимиз ҳеч бир давлатдан кам эмас. Унинг гўзал ва мафтункор табиати, жаннатмонанд боғлари, зилол сувлари, ер юзидаги ҳеч бир маконда топилмас бебаҳо неъматларнинг барчаси Аллоҳ томонидан шу юртга, унинг бандаларига берилган инъом, неъматдир. Яна таъкидлашимиз керакки, дунёнинг турли ҳудудларида кучли ер силкинишлари, сув тошқинлари, ҳаддан ташқари жазирама ёки қаҳратон совуқ каби табиий офатлар юз бераётганини эшитиб, Аллоҳ бундай офат-балоларни юртимиздан кўтараётгани учун ҳам шукроналар келтиришимиз керак. Уларнинг қадрига етиб, шу муқаддас заминни асраб-авайлаш инсонийлик бурчимиздир.

Ватанимизнинг тинчлиги ва осойишталигини сақлашда ҳар биримиз огоҳ бўлайлик, ҳеч бир иллатга эътиборсиз бўлмайлик. Юртбошимизнинг "Лоқайдлик, бепарволик энг ёмон иллат" деган сўзларини асло унутмайлик. Аллоҳ юртимизга азиз неъматларини зиёда қилаверсин.

Одилжон ҚЎЛДОШЕВ,

Избоскан туманидаги "Аҳмаджон ҳожи" жомеъ масжиди имоми.

Одилжон ҚОСИМОВ,

Андижон шаҳридаги

"Уйғур" жомеъ масжиди имоми.