ЖУРНАЛИСТЛАР УЧУН СЕМИНАР-ТРЕНИНГ

Андижон шаҳридаги "Ҳамкор" бизнес-марказида Ўзбекистон босма ОАВ ва ахборот агентликларини қўллаб-қувватлаш жамоат фонди ҳамда Халқаро журналистларни қайта тайёрлаш маркази ҳамкорлигида "Оила институтини мустаҳкамлаш асосида бола фаровонлиги масалаларини ёритишда оммавий ахборот воситалари салоҳиятини ошириш" мавзусида семинар-тренинг ўтказилди.

Вилоятдаги босма оммавий ахборот воситалари муҳаррирлари иштирок этган мазкур анжуманда мамлакатимизда ҳуқуқий-демократик ва фуқаролик жамиятини шакллантириш, жамиятнинг асосий бўғини ҳисобланган оила институтини мустаҳкамлаш, болалар ҳуқуқларини ҳимоя қилиш, уларнинг ҳуқуқий билим ва маданиятини юксалтириш, бу борадаги миллий ва халқаро қонунчилик, хусусан, "Бола ҳуқуқлари тўғрисида"ги конвенцияни ўрганиш, мазкур йўналишда фаолият олиб борувчи журналистлар билим ва малакасини ошириш каби масалалар хусусида атрофлича сўз юритилди.

Семинар-тренингда мутахассислар томонидан "ОАВларида болалар фаровонлигининг ёритилиши масалалари", "Бола парвариши билан боғлиқ ижобий амалиётнинг ёритилиши", "Бола ҳуқуқларининг ёритилиши ва журналист этикаси" каби қатор мавзуларда қизиқарли маърузалар ўқилди.

Куннинг иккинчи ярмида иштирокчилар гуруҳларга бўлинган ҳолда машғулотларда иштирок этдилар. Мавзулар интерфаол усуллар орқали тушунтирилди, тайёрланган ижодий ишлар мавжуд меъёр ва андозалар асосида таҳлил этилди. Мавзулар доирасида таклиф, фикр ва мулоҳазалар билдирилди. Қатнашчилар ўзларини қизиқтирган саволларга мутахассислардан атрофлича жавоб олдилар.

Ф. ИБАЙДУЛЛАЕВ.