МУЛОҲАЗА

ФАРЗАНДЛАРИМИЗГА ЭЪТИБОРЛИ БЎЛАЙЛИК

Фарзандларимизнинг қандай инсонлар бўлиб камол топиши кўп жиҳатдан ён-атрофдаги муҳитга, уларга бераётган тарбиямизга, қолаверса, ота-онанинг фарзандига кўрсатаётган эътиборига боғлиқ.

Кейинги пайтларда кўча-кўйда ёшлар тарбияси, уларнинг хулқ-атвори билан боғлиқ кўнгилсиз ҳолатларга тез-тез дуч келаётганлигимиз кўнглимизни хижил қилади. Ўсмир-ёшларнинг жамоат жойларида ўзини ғайритабиий тутиши, керагидан ортиқ бачкана кийиниши ёки тинмай телефонда сўзлашишларини кўриб, наҳотки, уларнинг ана шу хатти-ҳаракатлари ота-оналари эътиборидан четда қолаётган бўлса, деган фикрга келаман.

Айни кунда жуда кўп ота-оналар фарзандларини бекаму кўст улғайтириш учун эртани эрта, кечни кеч демай иш билан банд, турмуш ташвишлари билан андармон. Тўғри, тирикчилик керак. Лекин шу ўринда айтмоқчиманки, тирикчилик деб фарзанд тарбиясига, уларнинг юриш-туришига эътиборсизлик, эртага янада каттароқ ташвишларни келтириб чиқариши мумкинлигини унутмайлик. Энг аввало, болага эътибор керак, уни эзгу ишларга илҳомлантиришимиз, одоб-аҳлоқли бўлишга, шунингдек, меҳнатга ўргатишимиз лозим. Шундагина улардан эртага ўзимиз истаган нарсани кутишимиз мумкин.

Халқимизда "Қуш уясида кўрганини қилади", деган нақл бор. Бу борада тарбияда оила муҳити жуда муҳим аҳамиятга эга. Ўзимиз тинмай ишласагу, боламизни меҳнатга, ҳалол-пок ризқ топишга, ундан роҳатланишга ўргатмасак, бу бўшлиқни ким, қандай тўлдиради? Ҳаётимиз мазмуни ана шу азиз дилбандларимиз экан, уларга эътиборли бўлайлик. Улар ўқишдан бўш пайтларида бекор қолмасин, бирор бир фойдали юмуш билан банд бўлсин. Агар улар ўз ҳолича қолса, юқорида таъкидлаганимиздек, турли ножўя ишларга аралашиб қолмаслигига, "оммавий маданият" деб аталаётган ҳолатлар таъсирига берилиб кетмаслигига ҳеч ким кафолат бермайди.

Азиз ота-оналар, фикр қилиб, ўйлаб кўрайлик, фарзандларимиз тарбиясига, ўқиб, пухта билим олишига, уларнинг юриш-туришига эътиборсиз бўлмайлик. Шундагина эртага одамлардан фарзандимиз хатти-ҳаракатларидан "отангга раҳмат", деган сўзни эшитамиз.

Жўрабек ЭРГАШЕВ,

Балиқчи тумани.