ҲАЁТ МАНЗАРАЛАРИ

СИЙРАТ

Автобус ойнасидан лип-лип ўтаётган манзараларга хомуш термулар экан, Манзура хола тўнғич ўғли Асқаралининг тўнг муомаласини эслаб ичидан зил кетди.

Келини Маърифатнинг остона ҳатлаб кузатиб чиқмагани бир бўлди-ю, ўғлининг совуққина хайрлашиб кетгани кампирнинг дилига баттар ғашлик солиб қўйди. Ёнидаги овсинлари олдида мулзам бўлганига ўкинди. Айниқса, катта овсини Ойсара синчков, "вой, Асқарали анча ўзгариб кетибди", дея илмоқли гап қилганида, онанинг дил яраси яна тирналди. Ўтган йили тўйда қишлоқдан келтирган совғаларга на ўғли, на келини рўйхуш бермаган, казо-казоларнинг туҳфаси олдида назарга ҳам олинмаган буюмлар тўйдан кейин ҳам эътибордан четда ётаверганди. Буни кўрган Манзура хола ботиниб келинига айтолмаган, ўшанда ҳам ўғлидан гинасини яшириб, қишлоққа қайтган эди...

Манзура хола кенгфеъл аёл бўлганидан тиш ёриб, шаҳардаги боласидан бошқаларга оғиз очмайди. Бўлмаса, бу сафар ҳам астойдил йўлга отланмас эди. Овсинлари унинг неварасини йўқлаш баҳонасида улар ҳам тўйга борадиган бўлишди. Мана оқибати. Яна ўша дилтанглик такрорланди. Уч-тўрт кун меҳмон бўлиб кетиш илинжида келган кампирларни Асқаралининг ўзиёқ иши кўплигини баҳона қилиб автобусга кузатиб қўйди. Аслида бир эмас, иккита машина бор уйларида. Қишлоққа икки соатда етса бўлади. Она булардан кўз юмиши мумкин эди-ю, аммо ёнидаги кампирлар тек туришармиди? Бир-бирига имо қилиб Манзура холага ачинганнамо қараб қўйишаётганидан уларнинг ичида нима кечаётганини билиш мумкин эди.

Эрталаб Асқаралининг ҳайдовчисига бозор-учар учун бир тахлам пул узатгани ва унинг тўрхалталарда алланималар олиб келганини кўрган она ўғлининг хотамтойлиги тутганидан севинган эди. Аммо кампир қайтар чоғида машина ичи бўм-бўшлигини кўриб, ҳайрон бўлди. Иккита нон кимни ўлдирибди! Ҳатто келини тушмагур қайнонасининг дастурхонини ҳам қайтармабди. Буни автобусга чиқиб пайқаган онанинг дили сиёҳ бўлди. Бутун бошли корхонанинг бошлиғи бўлиб юрган Асқарали лоақал онасини сийламабди ҳам. Онасига йўл кира пули тутишни ҳам раво кўрмаган ўғил кетгач, кампирлар ҳали жойидан жилмаган автобусдан тушиб, қишлоқдаги набираларига ул-бул ширинлик харид қилган бўлишди...

Буларни ўйлаб бораётган Манзура хола ўзи эккан ниҳолнинг соясида ўзи тин олиб, мевасини тотиш бахтидан бенасиблигидан ўкинди. Асқарали эса бу пайтда суюкли хотинининг истагини бажариб, "бемаврид" ташриф буюрган меҳмонларни ўз вақтида кузатиб қўйганлигидан масрур, оромкурсига ястаниб ўтирарди.

Гулжаҳон ЖАББОРОВА.