КЕЧИНМА
Янги йил сўзига ҳар ким ўз топгани йўқотганидан келиб чиқиб таъриф беради.
Аслида эса "янги " сўзининг ўзи яхши, бори яхши...
Эндигина ижод дунёсига кириб келган шоир бола жажжи рисоласини эълон қилди. Адабиётда янги ном юлдуздек чақнади. Йигитча хурсанд, аммо чўчийди. "Ахир у хали ижодда янги".
Туғруқхона атрофида сабрсизлик ила у ёқдан-буёққа бориб келаётган куёв боланинг нигоҳларида янгиликка ташналик зоҳир.
Шифокор аёлнинг юқори деразадан имлаб чақириши тўзғин хаёлларига тўзим берди: "Янги меҳмон муборак!" узоқ вақт орзу қилган қимматбаҳо кийимни ва ниҳоят азиз инсони томонидан ҳадя қилиниши мунис аёлни кўзларига чексиз қувонч бахш этди.
"Кўйлакнинг янгиси бунча чиройли бўлмаса!" жажжи қизчаларимга дадаси ҳар сафар янги ўйинчоқ олиб келса, эскиси бир четда қолиб кетади. Катта қизимдан аввалги ўйинчоқни нима сабабдан ўйнамаётганини сўрасам, у ўйинқароқлик билан: "Ахир дадам янгисини олиб берди-ку!" дейди.
Қалбингизга меҳмон бўлиб келган янги туйғудан бошингиз айланади, бахтдан сармастсиз...
Остонангизга кириб келган янги келинчакнинг ийманиб туриши ёдингизга бахтиёр ёшлик дамларингизни солади.
* * *
"Янги"ларнинг энг чиройлиси, энг кўрками, энг улуғи эса Янги йилдир! янги йилнинг шукуҳи ўзгача. Илк қадамларини ташлаган янги йил ўзи билан бирга янги бахтни, янги омадни, янги режаларни, янги ғалабаларни, энг асосийси, эзгулигу яхшиликларга бўлган янги умидни бошлаб келади. Бу умид бизни яхши кунларга, юксакликларга етаклайди.
Янги йилим - яхши йилим,
Умидларга тўла дилим,
Қоринг ила ёруғ йўлим,
Кутганимиз ўзинг яхши!
Сенда бисёр қанча имкон,
Берарларинг улуғ аркон,
Бағринг режаларимга кон,
Кутганимиз ўзинг яхши!
Янги йилим-яхши йилим,
Эски дардлар тилим-тилим,
Ташрифинга ташна элим,
Кутганимиз ўзинг яхши!
Янги йил... нимагадир ёҳуд кимларгадир ташна қалбнинг янги илинжи.
Янги йил барчамизга қутлуғ келсин!
Зилола РАҳМОНОВА.
|