ҚАТРА

ЯШАШ БАХТИ - САЛОМАТЛИКДА

Ҳаёт ширин. Яшаган сари яшагинг келади. Ҳатто, дунёга келган чақалоқ кўзи юмуқ бўлса ҳам чинқириб-чинқириб йиғлайди. Бу ҳам яшашнинг бир бахти эканидан даракдир. Она ҳам боласини бағрига босиб, яшаш бахтининг яна бир қувончини ҳис этади. Унга умрлар тилайди, соғлик сўрайди...

Ота-она фарзандларига умр бўйи меҳрибон, соғликларига посбон. Эндигина юра бошлаган фарзандини қоқилмасин-йиқилмасин, дея парвона бўлишади, эркалаб тўйишмайди. Агар боласининг бирор жойи заррача озорланаётганини билишса, дунёларга сиғмай кетишади. Шифохонага олиб бориб, боласининг оддийгина бош оғриғига бўлсада, даво топмагунича жони тинчимайди.

Агар ота-она мана шундай оғрисаю, фарзандлар жон куйдирмаса, хабар олишмаса, ҳақиқатни эгилгани шу, сингани шу бўлса керак. Фарзандлар елкасидаги бурчни ота-оналарини етаклаб, опичлаб уддаласин. Улар кучдан қолганда, мадор бўлсин. Оғизларига овқат ёқмай қолганда, уларнинг оқ сутини ҳалоллаш учун, бир пиёла сут қайнатиб тутсинлар.

Ҳаётда яшаш олий бахт бўлса, яхши яшаш ундан-да улуғ бахтдир. Яхшилик, эзгулик ортингиздан қоладиган ягона меросингиздир. Ширин сўзингиз, лутфли каломингиз билан барчанинг кўнглидан чуқур ўрин олишингиз мумкин. Мана шундагина ўтказган умрингизга ачиниш сезмайсиз. Инсон ўзидан, ҳаётидан қониқиш ҳосил қилса, руҳий тетикликка эришади. Руҳи тетик инсонлар эса саломатлик гўшасининг хукмдорларидир. Улар ҳамиша кулиб, қувонч билан соғ-саломат яшайдилар. Соғлик эса бойликдир. Унинг қадрига етиб яшашда ҳикмат кўп.

Абдураҳим БОЗОРБОЕВ.