ИЧКИ ИШЛАР ХОДИМЛАРИ БЕЛЛАШДИЛАР
Избоскан тумани маданият саройида ички ишлар ходимлари ўртасида "Сиз қонун янгиликларидан хабардормисиз?" номли кўрик-танлов бўлиб ўтди.
Соҳа ходимларининг касбий билим, малака ва тажрибаларини бойитиш мақсадида ўтказилган мазкур танловда вилоятимизнинг бир қатор туман ва шаҳарлари ички ишлар бўлимлари жамоалари, яъни Андижон шаҳарининг "Фемида", Андижон туманининг "Тинчлик", Олтинкўл туманининг "Жасорат", Пахтаобод туманининг "Ғолиб" ҳамда Избоскан туманининг "Адолат" жамоалари бешта шарт бўйича ўзаро беллашдилар. Иштирокчи жамоаларнинг ижтимоий-сиёсий, касбий соҳадаги билимлари бўйича савол-жавоблар, соҳада амалга оширилаётган ишлар хусусидаги саҳна чиқишлари кўпчиликда катта таассурот қолдирди.
Якуний натижаларга кўра, Олтинкўл туман ички ишлар бўлимининг "Жасорат" жамоаси ғолибликни қўлга киритиб, танловнинг вилоят босқичида қатнашиш ҳуқуқига эга бўлди. Ғолиб ва совриндор жамоалар танлов ташкилотчилари томонидан эсдалик совғалар билан тақдирланди.
С. ЖУМАЕВ
|