ЁШЛАР СПОРТ ФЕСТИВАЛИ

Жалақудуқ туманида "Соғлом бола йили" давлат дастури ижросини таъминлаш ҳамда ўқувчи-ёшларнинг бўш вақтларини мазмунли ўтказиш мақсадида спорт фестивали ташкил этилди.

Туман ҳокимлиги, "Камолот" ЁИҲ туман кенгаши, маданият ва спорт ишлари бўлими, туман халқ таълими муассасалари фаолиятини методик таъминлаш ва ташкил этиш бўлими ҳамда Болалар спортини ривожлантириш жамғармаси туман бўлими ҳамкорлигида ўтказилган мазкур фестивалда 1100 нафарга яқин спортга қизиқувчи ўқувчи-ёшлар спортнинг баскетбол, волейбол, қўл тўпи, енгил атлетика, стол тенниси, мини футбол турлари бўйича ўзаро баҳс олиб бордилар. Шунингдек, имконияти чекланган ўқувчилар ўртасида шахмат-шашка мусобақалари ташкил этилди.

Айни кунда тумандаги умумий ўрта таълим мактабларида таҳсил олаётган 22443 нафар ўғил-қиз бўлиб, шундан 7500 нафарга яқини спортнинг бир неча турлари билан мунтазам шуғулланмоқда. Уларнинг 3000 нафари қизлардир.

Бўлиб ўтган мусобақаларда улар ўз имкониятларини синовдан ўтказдилар. Якунда барча турлар бўйича ғолиблар ҳамда ғолиб жамоалар ташкилотчилар томонидан фахрий ёрлиқ ва эсдалик совғалари билан тақдирландилар.

У. МАМАРАСУЛОВ.