УМУМХАЛҚ ҲАШАРИ

УЮШҚОҚЛИК БИЛАН ЎТДИ

Наврўз байрами олдидан ўтказилган умумхалқ ҳашари вилоятимизда уюшқоқлик билан ўтказилди.

Ушбу ҳашарда вилоятнинг ҳар бир гўшасини озода ва орасталигини, покиза ва ободлигини таъминлаш, халқимизнинг кексалар, етим-есирлар ва ногиронларга меҳр-мурувват кўрсатишдек азалий қадриятлари давомийлигининг ёрқин намунаси бўлди.

Ҳашар доирасидаги ободонлаштириш ишларида 1 млн. 500 минг нафардан зиёд аҳоли, иштирок этган бўлса, уларнинг 800 минг нафардан зиёдини ёшлар ташкил этди.

- Шу куни 3 минг гектардан зиёд ер майдони ободонлаштирилиб, 1925 км. ариқлар тозаланди, 3071 тонна чиқиндилар чиқариб ташланди. Бу ишларни бажариш учун 1500 дан зиёд техника воситалари жалб этилди. Бундан ташқари, 766 та зиёратгоҳ ва қабристонлар тозаланди. 1 миллион тубдан ортиқ дарахтларга шакл берилиб, оқланди, 1 миллион тубга яқин гул ва дарахт кўчатлари экилди. Вилоят бўйича 1343 та оиланинг 34179 метр квадрат уй-жойлари ҳашар йўли билан таъмирлаб берилди. Бу ишларни бажариш учун 116 миллион 281 минг сўм маблағ сарфланди.

Мазкур ҳашарда, умуман, юртимизнинг ҳар бир гўшаси, ҳар бир кўча ва маҳалласини, қўйингки, ҳар бир хонадонни обод қилишдек эзгу ҳаракатда барча фаол иштирок этди.

Хосият СИДДИҚОВА.