"АССАЛОМ, НАВРЎЗ"

Марҳамат туманида қишлоқ ва маҳалла фуқаролар йиғинлари фаоллари иштирокида "Ассалом, Наврўз" деб номланган байрам тадбири бўлиб ўтди. Тадбирда туман ҳокимининг ўринбосари, хотин-қизлар қўмитаси раиси Зуҳрахон Дадажонова барчани байрам билан муборакбод этди.

Тадбир доирасида маҳалла фуқаролар йиғинлари маслаҳатчилари ўртасида "Соғлом бола йили"га бағишланган танлов ҳам ўтказилди. Танлов иштирокчилари белгиланган шартлар, яъни саҳна кўриниши, алла, ёр-ёр, лапар айтиш, миллий қўшиқлар ижро этиш бўйича ўзаро куч синашдилар, айниқса, Ўзбекистон Халқ шоири Муҳаммад Юсуф шеърларидан намуналар ўқиш бўйича чиқишлар тадбирга кўтаринки руҳ бағишлади.

Якунда барча йўналишлар бўйича юқори баҳо олган "Гар-гар" МФЙ маслаҳатчиси Гулнора Абдуллаева ғолиб деб топилди. Ғолиб ва фаол иштирокчиларга ташкилотчилар томонидан эсдалик совғалар топширилди.

М. СОБИРОВА.