ОРАМИЗДАГИ АЁЛЛАР

ҚУРОҚЧИ ҲУНАРМАНД ҚИЗ

Ўзбек халқи азал-азалдан ўзининг меҳр-муруввати, барчага эзгулик, яхшилик улашиш каби фазилатлари билан ном қозонган.

Наргиза Мамтиминова миллий қуроқчилик ҳунари сирларини пухта эгаллаган пахтаободлик аёлларимиздан бири. У Пахтакор қишлоқ фуқаролар йиғини ўрамидаги "Терактаги" маҳалласида истиқомат қилади. Наргиза ёш бўлишига қарамай, тикувчилик сир-асрорларини мукаммал ўрганиб, ўз хонадонида бир неча йиллардан буён ёшларга ҳунар ўргатиб келмоқда. Бу чевар қизга бугун ҳамманинг ҳаваси келади. Наргиза миллий қуроқчилик намуналари асосида тиккан қуроқ болиш, енгча, тўшакчалар, чойнак ёпқич, чимилдиқ, болишлар, бешик тўшаклар ва ғилофлари, қуроқ кўйлак, эсдалик совғалари каби ўндан ортиқ маҳсулотларини кўриб, инсон қўли мўъжизалар яратишга қодир эканлигига гувоҳ бўласиз.

Наргиза болалик чоғларида бувиси Умринисо онанинг ёнида юриб, бу ҳунарнинг ҳадисини олган. Бувиси 100 ёшга киргунча қуроқ тўшаклари тайёрлаб, қишлоқда "чевар хола" деб ном олган. 104 ёшида оламдан ўтган. Эвараси бўлган Наргизага бувисининг меҳри бўлакча эди. "Сен қизгина менинг ҳунаримни эгаллайсан, шекилли-а", - деб пешонасидан ўпиб қўярди. Ўшанда у олти ёшда эди. Мактабда ўқиётган чоғида тикувчиликка қизиқиши ва иштиёқини билгани учун онаси уни маҳалласидаги Зулайхо ая Исмоновага шогирд қилиб берди. Йиллар ўтиб Наргиза аёллар либосини тикадиган чевар қизга айланди. Атрофида иш ўрганаман, дейдиган ёшлар кўпайди.

Наргиза ўтган йили Тошкентдаги "Машҳура" ўқув марказида 3 та йўналиш бўйича ўқиб, иш ўрганиб келди. Дизайнерлик, эркаклар шими, элита пардаси тикишни ҳам йўлга қўйди. Айни пайтда 15 та шогирдлари билан буюртмалар асосида маҳсулот тайёрламоқда.

- Уйимиздаги иккита катта хоналарни бичиш, тикишга мўлжаллаб, мослаштирб олганмиз, - дейди Наргиза. - Дастлаб 1-2 та тикув машинаси билан иш бошлаган бўлсам, айни пайтда топган даромадларимиз эвазига тикув машиналаримизни 10 тага етказдик. Шунингдек, буюртма асосида ҳарбийлар учун кийим тикишни ҳам бошладик.

Тиниб-тинчимас бу ҳунарманд қизнинг тиккан кўйлакларидан ортган материаллардан тайёрланган сунъий гулларни кўриб ҳам ҳавасингиз келади. Наргиза мана бир неча йиллардан буён туман ва вилоят миқёсида ўтказиб келинаётган кўргазма ва танловларда ўз маҳсулотлари билан фаол қатнашиб келмоқда. Айниқса, ўтган йил Наргизанинг ҳаётида ўчмас из қолдирди. У "Ташаббус" кўрик-танловида қатнашиб, вилоятда "Энг яхши ҳунарманд" номинацияси бўйича ғолиб бўлди. "Йил аёли-2012" танловида мувафақиятли қатнашди.

Бир қишлоқ аёлининг интилишлари, бир ҳунарнинг орқасидан эришган муваффақиятларини кўриб, изланганга имконият кенг эканлигига яна бир бор амин бўлдим.

Зумрадхон АБДУЛЛАЕВА