МУЛОҲАЗА
РЕКЛАМАСИЯМ БОР БЎЛСИН
Яқинда қўлим лат еб, анча дард тортдим. Шифокорга боришга қунт қилолмай ўз билганимча дори-дармон қила бошладим. Шунда қўшним чиқиб, оғриётган бўлса, "Диклоран плюс", "Фастум гел", "Цинепар актив"лардан суринг. Дарров оғриқдан қутуласиз, деб маслаҳат берди.
Ана телевизорни кўринг, мана шу дориларни ҳар куни реклама қилади .
Қўшнимнинг маслаҳатидан билдимки, рекламанинг инсонлар орасида қанчалар оммалашгани ва таъсир ўтказаётганига яна бир карра амин бўлдим.
Телевизорни қўяман. Кино ва кўрсатувлар оралиғида берилаётган рекламанинг 80 фоизини дори-дармонлар эгаллаган. Баҳордан бошлаб кузгача давом этадиган салқин ичимликлар рекламаси кунлар совиши билан шамоллаш, грипп, томоқ оғриғига қарши дорилар тарғиботи билан давом этади.
Рекламанинг таъсирчан кучи исботланган. У бизнесни ривожланишига ёрдам беради. Аммо дори-дармонларнинг ҳаддан ортиқ рекламаси инсонларни тиббий маданиятини пасайтириб ва соғлигига нисбатан беэътибор қилиб, қўймаяптими?
Масалан, жигари хаста бир танишим шамоллаб қолганди. Касалхонада даволаниб, зада бўлганиданми, шифокорга учрагиси келмади. Реклама қилаётган турли дориларни ичиб, ўзича даволанди. Охир-оқибат яна жигари оғриб, касалхонага тушди.
Умуман, дориларни реклама қилганда, уларни қабул қилиш вақти бир-бирига тўғри келиш келмаслиги ҳақида гап йўқ. Шундай бўлгач, унинг натижаси қандай бўлади?..
Зумрадхон АБДУЛЛАЕВА.
|