МИЛЛИЙ ҚАДРИЯТЛАРИМИЗ УНУТИЛМАЙДИ

Ўзбекистон "Миллий тикланиш" демократик партияси Андижон вилоят ва шаҳар кенгашлари ҳамда Андижон шаҳар ҳокимлиги ҳамкорлигида "Истиқлол берган имкониятлар: Ўзбекистон кеча ва бугун" мавзусида маънавий-маърифий тадбир бўлиб ўтди.

Партия фаоллари, депутатлар ва ёшлар иштирок этган мазкур тадбирда давлатимиз раҳбари Ислом Каримовнинг мамлакатимиз мустақиллигининг 23 йиллигига бағишланган тантанадаги нутқи, шунингдек, жорий йилнинг май ойида Самарқанд шаҳрида бўлиб ўтган "Ўрта асрлар Шарқ алломалари ва мутафаккирларининг тарихий мероси, унинг замонавий цивилизация ривожидаги роли ва аҳамияти" мавзусидаги халқаро конференциядаги маърузаси мазмун-моҳияти ҳамда ғоясини кенг жамоатчилик ўртасида тарғиб қилиш, халқимизнинг бой ва бетакрор маданий, маънавий ҳамда ахлоқий мерос ва миллий анъаналарига таянган ҳолда фуқароларимизни, айниқса, ёшларни миллий ғурур, истиқлол ғояларига ҳурмат ва ватанпарварлик руҳида тарбиялаш, кўп асрлик миллий қадрият ва урф-одатларни сақлаб қолиш ва келажак авлодларга етказиш хусусида сўз юритилди.

Тадбир қатнашчиларига мавзу доирасида кенг маълумотлар берилди, ана шу йўналишдаги ишлар самарадорлигини ошириш юзасидан таклиф, фикр ва мулоҳазалар билдирилди.

Якунда бир гуруҳ юртдошларимизга, партия фаолларига фахрий ёрлиқ ва эсдалик совғалар топширилди.

Д. АСҚАРОВ.