Сиз нима дейсиз?

ШИРИН ТУЮЛГАН ЁЛҒОН

Телефон жиринглайди...

Экранда намоён бўлган рақамга қараб кайфиятингиз тушади. Боришга ваъда берган эдингиз... Ёдингиздан кўтарилибди. Гўшакни кўтармасангиз яна бўлмайди. Осонгина касал бўлиб қолганингизни айтасиз. Ажабо, нега ёлғонни бунчалик кўп ишлатамиз. Гўёки усиз кунимиз ўтмайдигандек. Таажжуб ... кези келганда тўғри сўздан кўра, ёлғонга тез ишонамиз! У туфайли қанчадан-қанча инсонлар тақдири бузилади, кимларнинг-дир орасига низо тушади. Буларни биламизу, лекин шу ёлғондан воз кеча олмаймиз.

Ёлғон гапиришга шу даражада ўрганиб қоляпмизки, баъзан тап тортмай, "нима, биргина ёлғон билан осмон узилиб ерга тушармиди, ишим битди-ку, " дея ғурурланиб ҳам қўямиз. Энг аянчлиси эса бу каби ҳолатларга осонгина кўз юма қоламиз. Эҳтимол, бу ким учундир унчалик катта муаммо эмасдир. Лекин, ёлғоннинг ширин, фаровон ҳаётимизга раҳна солмаслигига ким кафолат бера олади? Бунга бепарволик билан қарасак, томчилардан денгиз пайдо бўлмасмикин? Сиз бунга нима дейсиз?

Ш. РАМАЗОНОВ.