МАТБУОТ АНЖУМАН
Андижон вилояти сайлов комиссиясида сайловларга тайёргарлик, мазкур жараёнда оммавий ахборот воситаларининг ўрни ва роли масалаларига бағишланган матбуот анжумани бўлиб ўтди.
Маълумки, шу йил декабрь ойида Ўзбекистон Республикаси Олий Мажлиси Қонунчилик палатасига ҳамда халқ депутатлари маҳаллий кенгашларга сайловлар бўлиб ўтади. Ана шу муҳим сиёсий жараёнга тайёргарлик доирасида бўлиб ўтган анжуман иштирокчилари вилоятда ташкил этилган 754 та сайлов участкалари, участка сайлов комиссиялари фаолиятини амалдаги қонунлар асосида ташкил этиш, фуқароларнинг сайловлар борасидаги билимларини, ҳуқуқий маданиятини юксалтириш, сайловларни очиқлик ва ошкоралик асосида ўтишини таъминлаш хусусида атрофлича сўз юритдилар.
Шунингдек, тадбирда участка сайлов комиссияларининг оммавий аборот воситалари билан ҳамкорлиги, сиёсий партиялар матбуот хизматлари ишини жонлантириш, сайловолди тарғибот-ташвиқот ишларини ташкил этиш, мазкур жараёнда ОАВларининг иштироки ва вазифалари муҳим эканлиги алоҳида таъкидланди.
Тадбир қатнашчилари томонидан муҳокама этилган масалалар, уларни самарали ташкил этиш юзасидан таклиф, фикр ва мулоҳазалар билдирилди, ўзларини қизиқтирган саволларга мутахассислардан атрофлича жавоб олдилар.
З.РАҲМОНОВА.
|