АНДИЖОНДА НИКОХ ТЎЙЛАРИ
"Маҳалла" ҳайрия жамоат фонди Андижон вилоят бўлими ташаббуси билан намунали тўйлар ўтказилмоқда. Куни кеча Андижон шаҳридаги "Олтин водий" тантаналар саройида вилоятимиз шаҳар ва туманларида истиқомат қилаётган 22 нафар йигит-қизнинг никоҳ тўйлари ўтказилди.
Қатор ташкилотлар ҳомийлигида келин-куёвларнинг яқинлари иштирокидаги тўй тантаналари шоду хуррамлик билан ўтди.
Тантанани вилоят ҳокимининг ўринбосари, вилоят хотин-қизлар қўмитаси раиси М. Юнусова очиб, келин-куёвларни муборакбод этди. Мустақил ҳаётга қадам қўяётган ёш оилаларнинг мустаҳкам ва бахтли бўлишларини тилади. Шундан сўнг "Маҳалла" ҳайрия жамоат фонди Андижон вилоят бўлими раиси Икромиддин Валиев ёш оилаларни табриклади. Андижон шаҳар ФҲДЁ бўлими мудираси Муқаддасхон Исақова уларга тантанали равишда никоҳ гувоҳномаларини топширди.
Эл суйган санъаткорларнинг куй-қўшиқлари, жозибали рақслар даврага ўзгача файз киритди.
З. АБДУЛЛАЕВА.
|