САЙЛОВЛАР ЮҚОРИ САВИЯДА ЎТАДИ

Вилоят сайлов комиссиясида Ўзбекистон Республикаси Олий Мажлиси Қонунчилик палатасига, халқ депутатлари вилоят кенгашига сайлов ўтказувчи округ сайлов комиссиялари раислари, аъзолари, шунингдек, ўзини ўзи бошқариш органлари раҳбарлари иштирокида семинар бўлиб ўтди.

Мамлакатимизда ҳуқуқий-демократик ва фуқаролик жамиятининг шаклланишида демократик, халқаро меъёр ва талаблар асосида ўтказилаётган сайловларнинг ўрни ва аҳамияти ниҳоятда катта. Шу маънода шу йил декабрь ойида бўлиб ўтадиган сайловларни юксак савияда ўтказиш учун зарур ишлар олиб борилмоқда. Семинарда сайлов жараёнини ҳар жиҳатдан пухта ва самарали ўтказиш муҳимлиги, округ сайлов комиссиялари аъзоларининг билим ва малакасини ошириш масалалари хусусида атрофлича сўз юритилди.

Семинарда сайлов қонунчилигидаги ўзгариш ва янгиликлар, сайлов комиссиялари фаолиятини самарали ташкил этиш, сайловларнинг, сиёсий партияларнин сайловолди тарғибот-ташвиқот ишларининг қонунлар доирасида ташкил этилишини таъминлаш, фуқароларнинг сайловлар борасидаги билимларини бойитиш каби қатор мавзуларда мутахассислар томонидан маърузалар ўқилди.

Тадбир қатнашчилари маърузалар юзасидан таклиф, фикр ва мулоҳазалар билдирдилар, ўзларини қизиқтирган саволларга мутахассислардан тегишли жавоблар олдилар. Шунингдек, иштирокчиларга айни кунда мазкур йўналишда амалга оширилиши зарур бўлган ишлар хусусида кенг тушунчалар берилди.

Ф. ИБАЙДУЛЛАЕВ.