Машҳурлар ҳаётидан

ДУНЁНИНГ ЭНГ БОЙ АЁЛИ

Аёл кишининг миллиардер бўлиши кам учрайдиган ҳолат, чунки машҳур Ғorbes журнали рейтингида асосан эркаклар ўрин эгаллашган. Миллиардер эркакларнинг рафиқалари ҳам ўзларини миллиардер деб аташлари мумкин, лекин ўз ақли ва меҳнати билан миллиардларга эришган аёллар ҳамма учун ибрат бўла олади. Ана шундай аёллардан бири хитойлик У Яцзюндир.

У Яцзюнь 1964 йилда Чунцин шаҳрида туғилган. У болалагидан лойиҳа чизиш ва қурилишга қизиқарди. Шунинг учун у 16 ёшидаёқ Хитойдаги шимоли-ғарбий саноат институтига ўқишга кирди ва 1984 йилда ўқишни битирди. Шуни қайд этиш жоизки, ўша вақтда институтга бир ўрин учун 200 киши ҳужжат топширган, абитуриентлар орасида энг ёши У Яцзюнь эди. Ўқишни битиргач, у тўрт йил заводда муҳандис бўлиб ишлади, сўнг шаҳардаги газеталардан бирининг кўчмас мулк бўлимида ходим бўлиб ишлай бошлади. Бу бўлажак миллиардернинг кўчмас мулк салтанатини барпо этишдаги илк қадами бўлди.

Бир неча йилдан сўнг у газетанинг бош муҳаррири бўлди, лекин таниқли бизнесменлар, инвесторлар ва кўчмас мулк эгаларидан интервьюлар олишни давом эттирди. Бундан ташқари, у қурилиш компанияларидан бирига ёлланма менежер бўлиб ишга кирди ва ушбу соҳани ўргана бошлади.

1993 йилда У Яцзюнь ўзининг Jiacheng Economic Development Company деб номланган қурилиш компаниясини ташкил этди. Ўшанда у эндигина 29 ёшга кирганди. Кейинроқ компания номи Chongqing Longfor Properties Co Ltd деб ўзгартирилди. Компания "Ўзинг учун пулни тежама" деган шиор остида иш олиб боради.

1994 йили унинг компанияси Чункинда турар жойлар қуриш бўйича тендер ғолибига айланди. Бу ёш тадбиркор аёл учун ҳақиқий муваффақият эди.

1999 йилга келиб, компания томонидан қурилаётган уйлар ҳали битмай туриб сотиб олина бошлади. У бу билан чегараланиб қолмади. Энди уйлар қуришдан ташқари, виллалар, дала ҳовлилар, ҳаттоки сунъий яримороллар қуриш билан ҳам шуғуллана бошлади. Бу билан унинг компанияси Хитой қурилиш бозорида етакчиликни ўз қўлига олди.

2010-2012 йилларда У Яцзюнь Ғorbes журналининг ўз меҳнати билан миллиардерга айланган аёллар рейтингида биринчи ўринни эгаллади. 2012 йилнинг мартида унинг бойлиги 5,5 млрд. доллар деб баҳоланди.

У жудаям талабчан ва меҳнаткаш: кунига 18 соатлаб меҳнат қилади, ходимларини қадрлайди. Офиси ҳали ҳам кичкинагина хонадан иборат, бизнес учрашувларига камтарона кийиниб боради. Йирик лойиҳаларни бошлаш олдидан ва биноларни эгаларига топширишгандан кейин энг яхши ишчи-ходимларига дунёнинг энг яхши курортларида икки ҳафта дам олиб келишлари учун компания томонидан маблағ ажратади. "Энг ёмони, бойлар рўйхатида тобора юқорига чиқиб борса-да, инсониятга, жамиятга, ўз ишчиларига фойдаси тегмайдиган инсон бўлишдир. Бундай бой бўлишдан нима наф?" дейди у.

У Яцзюнь собиқ газета ходими, бош муҳаррир бўлган бўлса ҳам, матбуот билан деярли учрашмайди. Телевидениеда кўринмайди, интервьюлар ҳам бермайди.

Ундан нима учун бундай қилишини сўрашганида, у жилмайиб: "Ўзим ҳақимда нимани ҳам гапираман, бутун фикрим ўз бизнесимда", деб жавоб берган.

ДИЛШОДБЕК тайёрлади.